მთავრობის მეთაურის, ირაკლი კობახიძის მიერ, “ქართული ოცნების” საპატიო თავმჯდომარე, ბიძინა ივანიშვილთან დაკავშირებით, გამართულ სპეციალურ ბრიფინგზე გაკეთებულ პოლიტიკურ და პიროვნულ შეფასებებს, თავის მხრივ, სკანდალური პოზიცია-ვარაუდებით ეხმაურება პოლიტიკური ფილოსოფიის დოქტორი, ანალიტიკოსი არჩილ გამზარდია:
“ბიძინა ივანიშვილსა და ირაკლი კობახიძეს შორის ცივი ომი აქტიურ ფაზაშია – ბიძინა ივანიშვილმა მორიგ ჯერზე აგრძნობინა კობახიძეს ვინ ვინ არის და ამის დასაზუსტებლად ბრიფინგიც ჩაატარებინა, თუმცა არც კობახიძე ჩამორჩა, ოფიციალურად დაადასტურა რომ გადაწყვეტილებებს ივანიშვილი იღებს და რაც ხდება ქვეყანაში, პასუხისმგებელიც ის არის, მე კი არ ვარო, თავის თავი მხოლოდ კორუფციის წინააღმდეგ მებრძოლად გამოხატა და ისიც დასძინა, რომ რაც მე ვარ პრემიერი, კორუფცია აღარ არისო, შესაბამისად აქამდე არსებული კორუფციაც ივანიშვილს მიათვალა.
როგორ ფორმალურად პოზიტიურ კონტექსტშიც და ქება-დიდების რეჟიმშიც გინდა ეტრიალებინა ივანიშვილის გვარი კობახიძეს ბრიფინგზე, სინამდვილეში კობახიძემ ბრიფინგზე ივანიშვილი მიწასთან გაასწორა და ბიძინა თუ ამას გაიაზრებს, მერე ეს დუელ-რეალითი შოუ დრამატურგიულად საკმაოდ საინტერესო ეტაპზე გადავა.
რეალითი შოუების იქით პოლიტიკურ ცხოვრებაში მეტი არც არაფერი ხდება ხელისუფლებაშიც და ოპოზიციაშიც და ჩვენც გავერთოთ, ჭაობში ჩაფლული კაცი რომ რამე სასაცილოს დაინახავს და გაეღიმება, სანამ ბოლომდე ჩაეფლობა, ისე, რაღას ვკარგავთ“, – წერს არჩილ გამზარდია სოციალურ ქსელში.
