საქართველოს მე-3 პრეზიდენტთან ჯანდაცვის სფეროს ექსპერტებს ისევ არ უშვებენ, აცხადებს მიხეილ სააკაშვილის ადვოკატი შოთა თუთბერიძე და სასამართლოს გადაწყვეტილებას შეახსენებს პენიტენციურ სამსახურს:
,,პენიტენციურმა სამსახურმა გამოიყენა ყველა ის ბერკეტი, რომელიც არსებობს ამ პროცესის გაჭიანურებისთვის. ეს არის უბრალოდ სამარცხვინო საქციელი!
სასამართლო, ერთის მხრივ – ხელს იშვერს პენიტენციური სამსახურისკენ და ამბობს, რომ იმან დაავალა, ხოლო პენიტენციური სამსახური ხელს იშვერს სასამართლოსკენ და ამბობს, რომ მათ არ მიუღიათ ჯერ-ჯერობით წერილი სასამართლოდან.
თუმცა, ცხადი არის ის, რომ სასამართლო სხდომა გადაიცემოდა პირდაპირ ეთერში. გადაწყვეტილების შინაარსი ცნობილია პენიტენციური სამსახურისთვის და არავითარი ხელოვნური ბარიერის შექმნის საჭიროება და აუცილებლობა, ბუნებრივია, არ დგას.
კანონით განსაზღვრული ვადა, კანონით განსაზღვრული შეზღუდვა არ არის. შესაძლებელი იყო მეორე ან იმავე დღესაც გადმოცემა. სამწუხაროა, რომ ამ მიმართულებით სასამართლო ვერ აღმოჩნდა სწრაფი და ეფექტური.
ამიტომ ვაპირებთ სიარულს და დაინტერესებას მანამ, სანამ არ ჩავიბარებთ“, – განაცხადა შოთა თუთბერიძემ
