ფრაქცია ,,ერთიანი ნაციონალური მოძრაობა – ძალა ერთობაშიას“ წევრი რომან გოცირიძე “მთავარი არხის” ჟურნალისტთან კომენტარს აკეთებს პრემიერ-მინისტრ ირაკლი ღარიბაშვილის განცხადებაზე, რომ ოპოზიცია ცდილობს ხელი შეუშალოს საქართველოს ევროკავშირში გაწევრიანებას. ოპოზიციონერ ლიდერს მიაჩნია, ხელისუფლება განტევების ვაცს ეძებს იმის გამო, რომ შესაძლოა საქართველო ევროკავშირში გაწევრიანების პროცესს ჩამოშორდეს:
,,საქართველოს მართავს ერთი ადამიანი თავისი პაიკებით. ამიტომ არის სერიოზული შიშები იმასთან დაკავშირებით, რომ საქართველო შეიძლება ამ პროცესს ჩამოცილდეს. ამიტომ ეძებენ განტევების ვაცს.
როგორც წესი განტევების ვაცად მოიაზრება ოპოზიცია. სხვისთვის გადაბრალების პოლიტიკა დიდი ხანია აქვს ,,ქართულ ოცნებას“, – განაცხადა რომან გოცირიძემ
ინფორმაციისთვის ირაკლი ღარიბაშვილის კომენტარი მედიასთან: ,,ჩვენი ევროპელი კოლეგები გაოცებულები მეც მიყვებოდნენ, ჩვენს კოლეგებსაც, რომ ოპოზიციის წარმომადგენლები მიდიოდნენ ევროკავშირში და სთხოვდნენ, ემუდარებოდნენ – ათას ცილისწამებას და დეზინფორმაციას ავრცელებდნენ, რომ რაიმენაირად ჩვენს მოქალაქეებს არ მიეღოთ უვიზო კავშირი.
მითხრეს, რომ რა ხდება?! რა უბედურება გჭირთ, რომ ჩამოდიან თქვენი ოპოზიციის წარმომადგენლები და გვეუბნებიან, რომ რაიმენაირად იქნებ, ასე ვთქვათ, არ იქნას პოზიტიური გადაწყვეტილება მიღებული საქართველოსთან მიმართებაში?!“, – განაცხადა ირაკლი ღარიბაშვილმა.
ავტორი
ნინი ხიჯაკაძე
