,,ერთიანი ნაციონალური მოძრაობის“ გენერალურმა მდივანმა, პეტრე ცისკარაშვილმა საგანგებო ბრიფინგზე განცხადება გააკეთა ბოლო პერიოდში მიმდინარე პოლიტიკური მოვლენების პარალელურად ,,ქართული ოცნების“ დამფუძნებლის ბიძინა ივანიშვილის მიერ შვეიცარიის ბანკთან ფინანსური დავის საკითხთან დაკავშირებით და პოლიტიკური შეფასება გააკეთა პარტიის თავმჯდომარის ირაკლი კობახიძის განცხადებაზე:
,,მინდა გთხოვოთ, გავიხსენოთ ბოლო 2 წლის განმავლობაში რა აღარ გადახდა თავს ჩვენს ქვეყანას ან თუნდაც გლობალური მასშტაბით, მთელს მსოფლიოს – დაწყებული COVID პანდემიიდან, გაგრძელებული ეკონომიკური კრიზისით და დასრულებული ბოლო მოვლენებით, როდესაც რუსეთი შეიჭრა და დღემდე ცდილობს უკრაინის დაპყრობას.
COVID პანდემიის დროს 17 000 ჩვენი თანამოქალაქე დაიღუპა. ეკონომიკა ჩავარდა უმძიმეს კოლაფსში და კრიზისში. ჩვენი თანამემამულეები დღეს, როდესაც ვსაუბრობთ, იბრძვიან უკრაინაში საკუთარი სამშობლოს, მიწის დასაცავად საერთო აგრესორისგან – რუსეთისგან. ცხადია, ისინი იბრძვიან ჩვენი უკრაინელი მეგობრების მხარდამხარ და თავისი მკერდით იცავენ უკრაინულ მიწასაც!
არც ერთ ამ საკითხზე, არც სხვა შედარებით მცირე მასშტაბის, მაგრამ ჩვენი საზოგადოებისთვის მნიშვნელოვან საკითხზე ბიძინა ივანიშვილს კომენტარი არ გაუკეთებია. ის საერთოდ არ თვლის საჭიროდ და თავს ანგარიშვალდებულებად, ქართული საზოგაოების, ჩვენი ხალხის წინაშე, რომ გამოვიდეს და ისაუბროს – რას გეგმავს? საით მიდის ქვეყანა? რას აპირებს ის ან მისი რუსული ოცნება?
იმიტომ, რომ ის ყველას ატყუებს თითქოს პოლიტიკაში არ არის, არ ერევა და გვერდზე არის გამდგარი, როგორც ჩვეულებრივი ფიზიკური პირი და არა პოლიტიკაში მყოფი ოლიგარქი.
მხოლოდ მაშინ, როდესაც პრობლემა დაუდგა მის პირად კაპიტალს – ფულს, ნახევარ მილიარდ დოლარს, ერთ-ერთ ყველაზე სანდო და ცნობილ შვეიცარიულ ბანკში, მხოლოდ მაშინ გამოდგნენ დღეს მთელი დღის განმავლობაში მთავრობის წარმომადგენლები, პარლამენტის წევრები, დაქირავებული ექსპერტები და მოთქვამენ, ტირიან რა ხდება? რატომ არ უბრუნებენ, არ ურიცხავენ, რატომ აჩერებენ ტრანზაქციას თუ უფერხებენ ბიძინა ივანიშვილს?!
შემოგთავაზებთ როგორია კონსტრუქცია, მაგალითად, რომელიც კობახიძემ გაახმოვანა დღეს დილას. ე.ი. უკრაინა, ევროკავშირი, აშშ, მოგეხსენებათ, ესენი ყველანი “ნაციონალები არიან”, მათი გაგებით, ითრევენ ბიძინა ივანიშვილს პოლიტიკაში და ამას აკეთებენ იმისათვის, რომ გაიხსნას მეორე ფრონტი და დაიწყოს ომი. რისი თქმა უნდათ, რომ სინამდვილეში არა რომელიღაც ოპოზიციური პარტია, რომელსაც აბსურდულად ბრალს უყენებენ მთელი 2 თვის განმავლობაში და ,,ომის პარტიას“ ეძახიან, ჩვენს პარტიას – ,,ნაციონალურ მოძრაობას“, არამედ ბიძინა ივანიშვილი ყოფილა მთავარი მოქმედი პირი და ფაქტორი, რის გამოც შეიძლება ომი დაიწყოს“, – განაცხადა პეტრე ცისკარაშვილმა.
ავტორი
ნინი ხიჯაკაძე
