“ექიმები ყველანი შეშფოთებულები არიან და ყველა ერთ აზრზეა, რომ აუცილებელია სტაციონარში ჩემი დაუყოვნებლივ გადაყვანა” – მიხეილ სააკაშვილი

გუშინ, დღის ბოლოს, ღამით გავრცელებული ინფორმაცია, მიხეილ სააკაშვილის სამოქალაქო კლინიკაში შესაძლო გადაყვანის თაობაზე, არ დადასტურდა. ამასთან დაკავშირებით მსჯავრდებულმა, ქვეყნის მე-3 პრეზიდენტმა, სოციალურ ქსელში, ფეისბუქის საკუთარი გვერდის მეშვეობით, შესაბამისი ინფორმაცია გაავრცელა და კონკრეტული განმარტებები გააკეთა:

“მადლობა ყველას, ვინც ციხესთან მოვიდა.

მეგობრებო, დღეს არ გადავუყვანივარ. რაც შეეხება ჩემს ჯანმრთელობის მდგომარეობას, ციხის ექიმები ყველანი შეშფოთებულები არიან და ყველა ერთ აზრზეა, რომ აუცილებელია სტაციონარში ჩემი დაუყოვნებლივ გადაყვანა, თუნდაც დროებით, სანამ შევძლებ ნამდვილ მკურნალობას, მაგრამ ეს ვერ იქნება ვერც გლდანი და ვერც გორი, სადაც ჩემზე განხორციელდა ფიზიკური და ფსიქოლოგიური ძალადობა, რომელთა შედეგადაც დადგა ჩემი დღევანდელი მდგომარეობა.

ძალიან მადლობელი ვარ საზოგადოების სოლიდარობის, განვიცდი ბათუმში დაკავებებს. ასევე, მადლობელი ვარ საერთაშორისო თანამეგობრობის მორალური მხარდაჭერის. იმედია, ეს ყველაფერი შედეგებს გამოიღებ“, – აცხადებს მიხეილ სააკაშვილი.