“ადამიანი არის მძიმე მდგომარეობაში – ასე გაგრძელება შეუძლებელია, გონს მოვეგოთ და რაღაც მომენტში სახელმწიფო, ეროვნული ინტერესები უფრო მაღლა უნდა დავაყენოთ” – გიორგი ვაშაძე

აშშ-ში, ვაშინგტინში ვიზიტით მყოფი, ,,სტრატეგია აღმაშენებლის“ თავმჯდომარე გიორგი ვაშაძე, ,,მთავარი არხის“ გადაცემაში ,,დღის ამბები“ ჩართვისას, კომენტარს აკეთებს საქართველოს მე-3 პრეზიდენტთან დაკავშირებით, განიხილავს ამერიკელი პარტნიორების დამოკიდებულებას ამ საკითხთან მიმართებაში და კონკრეტულ შეფასებებს აკეთებს:

,,მე ერთი შემიძლია ვთქვა, რომ თუ შევადარებთ რამდენიმე თვის წინანდელ ვითარებას, დღეს ცალსახად ეს საკითხი უკვე განრიგში არის და ამაზე თვითონ სვამენ კითხვებს. ქალბატონი რაისი, რომელსაც ჩვენ გუშინ შევხვდით, რომელიც თბილისში იმყოფებოდა – მან თვითონ იკითხა, რომ როგორ ვხედავდით გამოსავალს.

ჩვენ ვუთხარით, რომ აქ საუბარია, ჰუმანიტარული მიზნებისთვის, ჯანმრთელობიდან გამომდინარე, მიხეილ სააკაშვილის გადაყვანაზე ევროპაში. ეს ხელს შეუწყობს როგორც პოლიტიკური თვალსაზრისით პოლარიზების შემცირებას ქვეყანაში, ასევე ქართული პოლიტიკური სპექტრის კონცენტრაციას იმ მნიშვნელოვან საკითხებზე, რაც ძალიან მნიშვნელოვანია ქვეყნის განვითარებისთვის.

ჩვენ ხომ გვესმის, რომ ახლა ამას ვინც არ უნდა შეეცადოს – არის თუ არა მიხეილ სააკაშვილის თუ ნებისმიერი პარტიის წევრი, ჩვენ ,,სტრაატეგია აღმაშენებელი“ ცალკე პოლიტიკური ძალა ვართ, რა თქმა უნდა, მაგრამ ჩვენ გვესმის ძალიან კონკრეტულად, ამას ძალიან კარგად იგებენ ჩვენი ამერიკელი პარტნიორებიც, რომ ეს საკითხი უნდა გადაწყდეს.

მყიფე განვითარებადი დემოკრატიებისთვის პრეზიდენტების ციხეში ჩასმა არ არის სწორი. მესმის, რომ შეიძლება ფორმალისტურად ვინმე შეედაოს საზღვრის უკანონო კვეთას ჰქონდა ადგილი. ეს ძალიან კარგად ესმის ჩვენს ამერიკელ პარტნიორებსაც პირდაპირ გეტყვით, მაგრამ არ არის ეს ის თემა და საკითხი, სადაც ასეთი ფორმალისტური მიდგომებით უნდა ვიმუშაოთ.

რაც შეეხება იმ დამცინავ რიტორიკას – ცილებს აქ ვერ მიიღებს და იქ. ჩემი აზრით, კიდევ ერთხელ მიუთითებს ,,ქართული ოცნების’’ სახეზე. იმიტომ, რომ ადამიანი არის მძიმე მდგომარეობაში.

მე მინდა ყველას ვუთხრა – ასე გაგრძელება შეუძლებელია. ცოტა უნდა ვინამუსოთ, გონს მოვეგოთ და რაღაც მომენტში სახელმწიფო, ეროვნული ინტერესები უფრო მაღლა უნდა დავაყენოთ. დამერწმუნეთ, რომ ისტორიული შავი ლაქა იქნება, ღმერთმა ნუ ქნას, მძიმედ დასრულდეს ყველაფერი, ეს ყველამ უნდა გავიაზროთ“, – განაცხადა გიორგი ვაშაძემ.

ავტორი
ნინი ხიჯაკაძე