საქართველოს პარლამენტის წევრი, ,,სტრატეგია აღმაშენებლის“ გენერალური მდივანი პაატა მანჯგალაძე ბიძინა ივანიშვილსა და რუს ბიზნესმენ ვლადიმერ ევტუშენკოვს შორი საუბრის ფარულ ჩანაწერთან დაკავშირებით კონკრეტული შეკითხვებით მიმართავს საპარლამენტო უმრავლესობას:
,,მე არ მეგულება საქართველოს პარლამენტში ადამიანი, ვისაც ომი უნდა და მით უმეტეს, ჩვენი ისტორიიდან გამომდინარე, ომი უნდა რუსეთთან, მაგრამ თავდაცვის უფლებაზე ხომ არ ვამბობთ უარს?!
ჩვენ სახელმწიფოებრიობასა და თავისუფლებაზე ვერ ვიტყვით უარს. ხალხის ინტერესი არის სახელმწიფომ აკეთოს თავის საქმე, მაგრამ თქვენ არ გცალიათ ამისთვის. არ გცალიათ მარტივი მიზეზის გამო იმიტომ, რომ თქვენ ანგარიშვალდებულებას არ გრძნობთ ხალხის წინაშე – პირდაპირ ვამბობ.
,,ქართული ოცნების“ ლიდერების უმეტესობამ იცის, რომ ის ხალხის მიერ კი არ არის არჩეული, ნომინირებულია ერთი ადამიანის მიერ და მის წინაშე გრძნობს ანგარიშვალდებულებას. მთელი სისტემა მუშაობს ამ ადამიანის ნება-სურვილის შესრულებაზე.
ხომ ვამბობთ, რომ ის ჩანაწერები, რაც გავრცელდა არ არის ავთენტური. მარტივ კითხვას გისვამთ: სუს-მა დაიწყო გამოძიება ამ მიმართულებით ავთენტურია თუ არაავთენტურია? ხართ დაინტერესებული ამ საკითხით? ასეთი კითხვა დასვით პრემიერ-მინისტრთან ან ბიძინა ივანიშვილთან? ევტუშენკოვს რა ესაქმება? კერძო პირია, პრემიერ-მინისტრს რატომ რევს ამ საქმეში?! თუ სახელმწიფოს საკითხები იყო, მაშინ ევტუშენკოვი რა შუაშია? ამაზე პასუხები ხომ სჭირდება საზოგადოებას?!
ახლა ლაპარაკობთ რაღაცა ომის პარტიაზე. ომის პარტიაზე კი არა ამ კონკრეტულ საკითხზე სჭირდება საქართველოს პარლამენტში პასუხი ხალხს.
რას ფიქრობს უმრავლესობა? რა ტიპის გარიგებებზე იყო ლაპარაკი? რა ტიპის საქმიან ურთიერთობებზე იყო საუბარი? რამდენად ჯდება ეს ყველაფერი საქართველოს სუვერენულ ინტერესებში?
ამ საკითხებს უპასუხეთ გამოსვლების დროს და არა რაღაც აბსურდული ომის დაწყების საფრთხეს“, – განაცხადა პაატა მანჯგალაძემ.
ავტორი
ნინი ხიჯაკაძე
