,,სტრატეგია აღმაშენებლის“ პოლიტიკური საბჭოს წევრი სერგო ჩიხლაძე კომენტარს აკეთებს პარტია ,,ქართული ოცნების“ დამფუძნებლის ბიძინა ივანიშვილთან, პრემიერ ირაკლი ღარიბაშვილთან და მთავრობასთან მიმართებაში. ოპოზიციონერი ლიდერი, ივანიშვილთან დაკავშირებით გავრცელებული ფარული ჩანაწერების გათვალისწინებით, ხელისუფლების კავშირებზე საუბრობს რუს ოლიგარქებთან:
,,ახლა უკვე ყველაფერი დალაგდა.
საქართველოში მყოფ ოლიგარქ ივანიშვილს, მისი სურვილების შემსრულებელ ბატონ ღარიბაშვილს და მის მთავრობას თურმე ურთიერთობა აქვთ სანქცირებულ რუს ოლიგარქებთან.
ევტუშენკოვი დავით ხიდაშელის საშუალებით ალაგებს ურთიერთობებს ბატონ ივანიშვილთან – ბიზნესს, სხვადასხვა საქმიანობას.
ახლა ისიც გასაგები ხდება – რატომ გადასცეს ბატონ დავით ხიდაშელს 104 ათასი ჰექტარი მიწა, რატომ სარგებლობს ასეთი პრივილეგიებით და ა.შ.?!
ანუ ყველაფერი ლაგდება!“, – განაცხადა სერგო ჩიხლაძემ.
P.S. ინფორმაციისთვის – სერგო ჩიხლაძის პოსტი სოციალურ ქსელში:
“რა გამომდინარეობს ახალი ჩანაწერებიდან (“აბნიმაიუს” და “დოროგოის” გარდა):
1. ივანიშვილი კვლავ აგრძელებს სანქცირებულ რუს ოლიგარქთან ბიზნესის კეთებას;
2. პრემიერი ღარიბაშვილი კვლავ რჩება ივანიშვილის ახალგაზრდა თანაშემწედ, მაგრამ შედეგების კუთხით, კიდევ უარესია, როდესაც ოფიციალურად, მაინც პრემიერ მინისტრი, სანქცირებული პირებთან და კომპანიებთან შუამავლობს;
3. როგორც ჩანს, სანქციების შესაძლო გვერდის ავლასთან დაკავშირებით, უკრაინის და ჩვენი დასავლელი პარტნიორების გაფრთხილებები და წუხილები უსაფუძვლო არ ყოფილა;
5. დავით ხიდაშელისთვის 104 000 ჰექტარის გადაცემაც გასაგები ხდება, რატომ და რისთვის ასაჩუქრებენ მას;
6. ყველა ნორმალურ ქვეყანაში ამ საკითხზე დაჩქარებულად გამოძიებას დაიწყებდნენ, ყველა მონაწილე პირის გამოკითხვით“, – წერს ფეისბუქის პირად გვერდზე სერგო ჩიხლაძე.
ავტორი
ნინი ხიჯაკაძე
