ტელეკომპანია “პირველის” საინფორმაციო სამსახურის ხელმძღვანელის, ნოდარ მელაძის კრიტიკულ პოზიციას, ფეისბუქის პირადი გვერდიდან ეხმაურება “ერთიანი ნაციონალური მოძრაობის” თავმჯდომარე ნიკა მელია და კონკრეტულ განმარტებებს აკეთებს:
“ნოდარ მელაძე, როგორც მედიას აქვს კრიტიკის უფლება, ასევე ყველას გვაქვს ამ კრიტიკაზე რეაგირების უფლება, თუ მას უსამართლოდ ჩავთვლით.
სიტყვის თავისუფლება და მორალური კრიტერიუმები არის ის, რომელზეც შეიძლება ვერასდროს შევთანხმდეთ, მაგრამ თუ არ ვიდავებთ არ ვიქნებით საზოგადოება.
ჩემს დღის წესრიგს, პოლიტიკურ დღის წესრიგს და სამოქმედო გეგმას, წინასწარ არ ვუთანხმებ არცერთ მედიას და არც შენ ნოდარ – ასე ვიქცეოდი მუდამ, ასე ვთქვი გუშინ და ასე იქნება, სანამ პოლიტიკაში ვარ და აქ არაფერია გასაკვირი და საწყენი.
კონტექსტი ლაივში იყო, არის ხელმისაწვდომი, შესაბამისად დამახინჯების მცდელობა წინასწარ განწირული ქმედებაა.
მე ვარ გულწრფელობის მომხრე, როგორც ადამიანურ ურთიერთობებში, ისე პოლიტიკაში.
მედიასთან თანამშრომლობაზე არასდროს მითქვამს უარი, არც არასდროს ვიტყვი და კრიტიკულ კითხვებსაც ყოველთვის ვუპასუხებ.
განსხვავებული აზრის მქონე ადამიანებთან, მიუხედავად მათი პროფესიული კუთვნილებისა, ყოველთვის მზად ვარ და ვიქნები დისკუსიისთვის“, – აცხადებს ნიკა მელია.
