„სტრატეგია აღმაშენებლის“ ლიდერი გიორგი ვაშაძე აცხადებს, რომ სენატორებისა და კონგრესმენების პოზიციას ექნება გადამწყვეტი მნიშვნელობა იმისთვის, რომ „ქართული ოცნება“ აიძულონ დაადგეს ნორმალურ და ცივილურ გზას. როგორც ვაშაძე აცხადებს, ის მომავალ კვირაში ვაშინგტონში მიემგზავრება, სადაც კონგრესმენებსა და სენატორებს კვლავ შეხვდება:
„ღიად და გულწრფელად მინდა ვთქვა, რომ ჩვენმა ამერიკელმა კოლეგებმა დეტალურად იციან ყველა ის საკითხი და პრობლემა, რომელიც საქართველოში დგას. პირველი – ეს არის უსაფრთხოება, მეორე – ეს გახლავთ დემოკრატიული რეფორმები და მესამე – არის, რომ საქართველომ თვითონ უნდა გადადგას ნაბიჯები ევროკავშირში დაჩქარებულად გაწევრიანებისთვის და მივიღოთ მეტი მხარდაჭერა ჩვენი ამერიკელი პარტნიორებისგან.
გვინდა ნატოს წევრობა? ეს გასაღები არის ჩვენს ხელში. მეტი რეფორმა, მეტი დემოკრატია, მეტი თავისუფალი სასამართლო, მეტი განვითარებული ეკონომიკა არის გზა ნატოში ინტეგრაციისთვის, ზუსტად იგივეა ევროკავშირთან მიმართებაშიც. ამიტომ ვფიქრობ, სენატორებისა და კონგრესმენების პოზიციას ექნება გადამწყვეტი მნიშვნელობა იმისთვის, რომ „ქართული ოცნება“ ვაიძულოთ დაადგეს ნორმალურ და ცივილურ გზას და არ განაგრძოს ის ანტიდემოკრატიული სვლები, რაც დღეს აქვს.
კიდევ ერთხელ ვამბობ, გვინდა მეტი მხარდაჭერა ამერიკისგან? ამისთვის საჭიროა მეტი რეფორმები. გვინდა ნატო? ამისთვისაც მეტი რეფორმებია საჭირო, გვინდა ევროკავშირი? ისევ და ისევ მეტი რეფორმები და ცვლილებებია საჭირო.
იმ გზით რა გზითაც ახლა „ქართული ოცნება“ მიდის ეს ყველაფერი არ იქნება.
რაც შეეხება პარტნიორების მხრიდან მეტ გარანტიას, მომავალ კვირას მე მივემგზავრები ვაშინგტონში და შევთანხმდით ჩვენს ამერიკელ კოლეგებთან, რომ მათთან მექნება ასევე შეხვედრები, სადაც უფრო დეტალურად გავივლით თუ რა საბოლოო პოზიცია ექნებათ მათ.
ერთი რამ ცალსახაა, ამხელა დელეგაციის ჩამოსვლის მთავარი მიზანი არის ის, რომ ჩვენ ყველას პირველ რიგში კი ქართველ ხალხს გააგებინონ, რომ ამერიკა ჩვენს გვერდით დგას და მათთვის მნიშვნელოვანია დემოკრატიული საქართველო“, – აცხადებს გიორგი ვაშაძე.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
