“მთავარი არხის” გენერალურმა დირექტორმა, ნიკა გვარამიამ გადაცემა “მთავარ აქცენტებში” თავისი პრინციპული პოზიცია დააფიქსირა მიხეილ სააკაშვილთან მიმართებაში:
„მინდა რამდენიმე სიტყვა ვთქვა მიხეილ სააკაშვილთან დაკავშირებით.
დღეს მე ვიყავი ციხეში, გუშინ – სასამართლოზე, იმის წინ კიდევ ერთხელ ციხეში და ა.შ.
სამწუხარო რეალობაა, რომ ჩვენ ყველანი, ყველანი – ვიმეორებ ამას, შევეჩვიეთ, რომ მიხეილ სააკაშვილი კვდება. ამას ჩვენ მივეჩვიეთ და გადავწყვიტეთ შევეგუოთ ან მდგომარეობას, რაღაც თვალსაზრისით. ან ვიფიქროთ იმაზე, რომ სხვა გზა არა გვაქვს, ან ვიფიქროთ იმაზე, რომ უღონოები ვართ, ან ვაგინოთ ოპოზიციას, რომ არაფერს არ შვრება, ან ვიფიქროთ მომავალზე – რომ მოკვდება ბიძინას ხომ “დაერხევა”, შესაბამისად ახალი კოალიცია მოვა ხელისუფლებაში, მეც ვიქნები და მაშინ ვიტყვი – მიშა რატომ მოკვდა?
მინდა გულწრფელად ვთქვა ჩემი დამოკიდებულება ამ საკითხისადმი.
პირველ რიგში მინდა გითხრათ, რომ ჩემი მდგომარეობა არის მძიმე, არა როგორც მისი უფლებადამცველის, არამედ როგორც მისი მეგობრის. მასთან ყოველი შემდგომი შეხვედრა არის კიდევ უფრო დაუძლურებულ და ღონემიხდილ ადამიანთან საუბარი.
შესაბამისად, ამ ეტაპზე, აღარ ვაპირებ ენის მოჩლექით საუბარს იმათთან, ვინც ატარებს აქციებს და მიხეილ სააკაშვილის, რაღაცნაირად, მიჩქმალვას ცდილობს – ან ტაქტიკური მოსაზრებებით ამბობს, რომ მოდით მიხეილ სააკაშვილი არ ვახსენოთ, ან გულწრფელად ფიქრობს, რომ რატომ უნდა იყოს ნახსენები მიხეილ სააკაშვილი აქციაზე? მე ასეთ აქციებს მხარს არ დავუჭერ! ასეთ აქციებზე არ მივალ და არცერთ ასეთ ადამიანს ჩემი მხარდაჭერა არასდროს ექნება!
როდესაც საქართველოს მე-3 პრეზიდენტი, უბრალოდ ადამიანი, ჩვეულებრივი მოქალაქე მიხეილ სააკაშვილი ჯერ იყო წამების მსხვერპლი და ახლა არის მინიმალური სამედიცინო დახმარების არაღმოჩენის მსხვერპლი, როცა ასეთ ადამიანზე ვინმე იტყვის რომ ის არ უნდა ახსენონ – ასეთი ადამიანების არც თანაგრძნობა მექნება, არც მათ გვერდით დავდგები, გავაკრიტიკებ ან არ გავაკრიტიკებ, ნებისმიერ შემთხვევაში მათი არსებობა ჩემთვის იქნება სულერთი.
თუ სააკაშვილის სიცოცხლე არის უმნიშვნელო, რაღაც მოტივებით მას არ ახსენებ, გინდა ძველი წყენების გამო და კიდევ უარესი – პრაგმატული პოლიტიკური მოსაზრებებით, ასეთი ამორალური ახალი მთავრობა მე არ მჭირდება, ამორალური მთავრობა მე ისედაც მყავს “ქართული ოცნების” სახით და რატომ უნდა ვიღვაწო, რომ ახალი ამორალური ხელისუფლება მოვიდეს?!
იმ ადამიანების გვერდით, ვინც ელოდება სააკაშვილის სიკვდილს (ასეთები არიან ამ ქვეყანაში და არა მარტო ქოცებში) არა თუ არ ვიქნები, იმ ადამიანებს გავანადგურებ, როგორც შემეძლება, პირდაპირი მნიშვნელობით ვამბობ ამას, – როგორც პოლიტიკურად, ისე მორალურად, ფიზიკური განადგურების მომხრე მე არ ვარ. ასეთ ადამიანებს პოლიტიკურ და მორალურ დღის სინათლეს მე არ ვაჩვენებ. ამ ადამიანებში მე ვგულისხმობ მათ, ვისაც შიზოფრენია სჭირთ და ურჩევნიათ სააკაშვილი მოკვდეს, რომ ამის გამო “ოცნება” შეიცვალოს. ასეთი ადამიანები, სამწუხაროდ, არიან ე.წ. თავგადაკლულ “მიშისტებშიც” და ასეთები არიან ოპოზიციაშიც, რომლებიც ფიქრობენ იმაზე, რომ “ქართული ოცნების” დასასრულის ერთადერთი რეცეპტი არის ეს და შემდეგ უკვე ჩვენ მოვიმკით მოსავალს. არა, ვერ მოიმკით მოსავალს, იმიტომ რომ სააკაშვილი არ მოკვდება! ვერ მოიმკით მოსავალს, იმიტომ რომ “ქართული ოცნება” შეიცვლება იმ ადამიანებით ვინც პრინციპულია, ვისაც მორალი და ფასეულობები აქვს და ვინც სააკაშვილს გადაარჩენს, მათ შორის, თუ არა პირველ რიგში და ისინი მოიმკიან მოსავალს. “მოსავალში” კი იგულისხმება სახელმწიფო სადავეების ხელში აღება“, – აცხადებს ნიკა გვარამია.
