დედაენის დღესთან დაკავშირებით, საქართველოს პრეზიდენტმა განცხადება გააკეთა, სადაც ისტორიულ შეფასებებთან ერთად, ქართული და აფხაზური ენების დაცვასთან ერთად სხვა ქართველურ ენების დაცვაზეც ისაუბრა:
„სახელმწიფო ენის დღე ეკუთვნის იმ უმნიშვნელოვანესი თარიღების რიგს, რითაც საქართველომ შეძლო საკუთარი მეობის შენარჩუნება, სახელმწიფოებრიობის გადარჩენა და გაძლიერება – რითაც დღემდე მოვიდა.
შეიძლება ითქვას, რომ 1978 წლის 14 აპრილით იწყება ჩვენი მსვლელობა საბჭოთა ოკუპაციისგან გათავისუფლებისა და დამოუკიდებლობისკენ.
კონსტიტუციაში სახელმწიფო ენის სტატუსის დაცვა და არდათმობა, რომელმაც შვა ეროვნული მოძრაობა, უტოლდება სხვა ისტორიულ თარიღებს და გამარჯვებებს – 1917 წელს ეკლესიის ავტოკეფალიის აღდგენას, 1918 და 1991 წლებში დამოუკიდებლობის აქტების მიღებას. ამ გამარჯვებაზე დგას დღესაც ჩვენი სახელმწიფო.
მიუხედავად რუსიფიკაციასთან უთანასწორო ბრძოლისა, საქართველომ შეძლო, დამოუკიდებლობასთან ერთად, გადაერჩინა თავისი 16 საუკუნოვანი ლიტერატურული მემკვიდრეობა, შეენარჩუნებინა 3 ქართული ანბანი და ამავე დროს მოეხდინა ქართული ენის მოდერნიზაცია.
ქართული კულტურის წინააღმდეგ ომს რუსეთი აგრძელებს აფხაზეთში, სადაც ერთნაირად იზღუდება, როგორც აფხაზური, ასევე, ქართული ენა. წლიდან წლამდე მცირდება აფხაზურ ენაზე მოსაუბრეთა რიცხვი. გალსა და მიმდებარე სოფლებში მცხოვრებ ქართველებს კი ეკრძალებათ ქართულ ენაზე სასკოლო განათლების მიღება.
ქართული და აფხაზური ენის დაცვასთან ერთად, რაც კონსტიტუციითაც გარანტირებულია, გვევალება მეგრულის, სვანურის, ჭანურისა და ლაზურის დაცვა და გადარჩენისთვის ზრუნვა, რამეთუ ეს ენები განუყოფელი ნაწილია ჩვენი კულტურის და წარმოადგენენ უნიკალურ სიმდიდრეს. ამას შევძლებთ, თუკი სკოლაში არჩევითი სწავლების უფლებას დავაწესებთ – პირველ რიგში მეგრულისა და სვანურისათვის“, – განაცხადა სალომე ზურაბიშვილმა.
