„მართლაც ისტორიულ პერიოდს გავდივართ. ჩვენ ერთი დიდი ნაბიჯი გადავდგით ევროინტეგრაციის მიმართულებით“, – განაცხადა საპარლამენტო ოპოზიციის წარმომადგენელმა გიორგი ვაშაძემ პარლამენტის პლენარულ სხდომაზე პოლიტიკური განცხადებების ფორმატში გამოსვლისას.
მისი თქმით, ევროპელმა პარტნიორებმა საქართველოს გუშინ გამოუგზავნეს კითხვარი.
„რა არის ეს კითხვარი და ჩვენი საშინაო დავალება? ეს არის სისტემური კომპლექსური დემოკრატიული რეფორმები, რაც უნდა გაატაროს ქვეყანამ. სწრაფი გაწევრიანება სწრაფი რეფორმების საპასუხოდ – ეს არის მოდელი, რომელსაც ჩვენი ევროპელი პარტნიორები გვთავაზობენ“, – განაცხადა გიორგი ვაშაძემ. მისი ინფორმაციით, ერთი კვირის წინ ევროპის პარლამენტის კვლევითმა ცენტრმა გამოაქვეყნა კვლევა, რომ 2020 წლის მერე საქართველოს აქვს უკუსვლა დემოკრატიული რეფორმების, მართლმსაჯულების, კორუფციასთან ბრძოლის კუთხით.
„ჩვენ ასოცირების შეთანხმება გვაქვს ევროკავშირთან, გვაქვს თავისუფალი ვაჭრობის შეთანხმება. აბა, თუ იცით, რომელია ჩვენი მთავარი 3 სავაჭრო პარტნიორი? არის რუსეთი, ჩინეთი და თურქეთი. არცერთი მათგანი არაა ევროკავშირის წევრი ქვეყანა.
ეს მიუთითებს იმაზე, რომ მართალია, ევროკავშირი ძალიან ბევრ ნაბიჯს დგამს ჩვენსკენ, მაგრამ საქართველო, სამწუხაროდ, ამ ყველაფერს ვერ იყენებს და ვერ იყენებს იმის გამო, რომ „ქართული ოცნება“ რეფორმების განხორციელების ნაცვლად არის რეფორმების მთავარი წინაღობა“, – განაცხადა გიორგი ვაშაძემ.
ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს
