პარლამენტის ყოფილი წევრი, პოლიტიკოსი სერგი კაპანაძე ხელისუფლების მიერ უკრაინის დახმარების მიზნით განხორციელებულ ღონისძიებებს არასაკმარისად მიიჩნევს და პუნქტობრივად ჩამოწერა, თუ რას გააკეთებდა თვითონ ხელისუფლების ადგილას რომ ყოფილიყო:
“პასუხი იმ ადამიანებს, ვისაც ჰგონიათ, რომ მთავრობა ყველაფერს აკეთებს უკრაინის დასახმარებლად და საქართველოს ინტერესების დასაცავად.
მე, მაგალითად, ამ 23 რაღაცის გაკეთებას შევეცდებოდი, ხელისუფლებაში რომ ვყოფილიყავი:
- ვიზიტი უკრაინაში სხვადასხვა მაღალჩინოსნების მიერ ხშირი პერიოდულობით: სპიკერი, პარლამენტის მეგობრობის ჯგუფი, პრემიერი, მინისტრები, პრეზიდენტი… ოპოზიციის მონაწილეობით;
- მკაფიო განცხადება, რომ საქართველოს გავლით არ მოხდება სანქციებისთვის გვერდის ავლა;
- სამხედრო და ორმაგი დანიშნულების საქონელის შესახებ იურიდიული ბაზის მოწესრიგება და მორგება სანქციების საერთაშორისო რეჟიმზე;
- საგანგებო კომისიის შექმნა ოპოზიციის და არასამთავრობოების წარმომადგენლების მონაწილეობით, რომელიც დაიწყებს სანქციების რეჟიმის მონიტორინგს;
- “შავი სიის” განსაზღვრა, რომელშიც უკრაინასთან მჭიდრო კოორდინაციით უნდა შევიდეს ის პირები, ვინც აღარასოდეს შემოვლენ საქართველოში და ვერ აწარმოებენ ბიზნესს საქართველოში;
- იმ 120 ათასი ადამიანის პირადი მონაცემების ანალიზი, რომლებიც, გამოქვეყნებული ინფორმაციით მონაწილეობს უკრაინის წინააღმდეგ აგრესიაში და მათი მყისიერი შეტანა შავ სიაში. რა თქმა უნდა, უკრაინასთან და დასავლეთის სადაზვერვო სამსახურებთან კოორდინაციით;
- ყველა იმ ადამიანის და მათი ოჯახის წევრის შეტანა შავ სიაში, ვისზეც უკრაინა, ევროკავშირი და აშშ სანქციებს აწესებს;
- გამოძიების დაწყება უკრაინაში მიმდინარე აგრესიის ფაქტთან დაკავშირებით, როგორც ამას აკეთებს ბევრი ევროპული ქვეყანა;
- სიმბოლურად 50.000 უკრაინელის საქართველოში ჩამოყვანის და განთავსების პირველადი ხარჯების აღება სახელმწიფოს მიერ;
- საკანონმდებლო პაკეტის მიღება, რომელიც ძალიან გაურთულებს ცხოვრებას რუსეთიდან დაფინანსებულ მედიას, არასამთავრობოებს და პოლიტიკურ ძალებს (ასეთი პაკეტი თავის დროს მე წარვადგინე პარლამენტში ევროპული საქართველოს სახელით; რაღაც მსგავსი აქვს ახლა წარდგენილი ლელოს);
- საქართველოს ყველა მოქალაქისთვის, რომელიც ახლა უკრაინაში იბრძვის საგანგებო ცხელი ხაზის შექმნა მათი საჭიროებების მისახედად;
- რუსეთისთვის ცის ჩაკეტვა (პირდაპირი ფრენები მაინც არაა და ეს მხოლოდ სიმბოლური ნაბიჯი იქნება);
- რუსეთიდან საქართველოსკენ სომხეთის გავლით მომავალი ავიარეისების რაოდენობის შემცირება/შეზღუდვა;
- თუ გვაქვს შესაძლებლობა, ისეთი იარაღის მიწოდება უკრაინისთვის (ჩუმად), რომელიც მყისიერად შეიძლება არ დაგვჭირდეს;
- პარალელურად ამერიკასთან, თურქეთთან და ნატოს წევრ ქვეყნებთან აქტიური მუშაობა, რომ შევიძინოთ/მივიღოთ, ან საჭიროების შემთხვევაში დავიბევოთ თავდაცვითი იარაღი;
- ჩვენი სამხედროების სასწრაფოდ გაგზავნა გადასამზადებლად, რომ, იმ შემთხვევაში, თუ თავდაცვითი ომი დაგვჭირდება, არ დადგეს მოუმზადებლობის და წვრთნის არქონის პრობლემა;
- განცხადების გაკეთება, რომ სრულიად დამოუკიდებელი ვხდებით რუსეთისგან გაზის და ელექტროენერგიის მხრივ და მყისიერად ჯერ სტრატეგიის შექმნა და შემდეგ განხორციელების დაწყება, მაგალითად, სწრაფადვე აზერბაიჯანული გაზით რუსულის ჩანაცვლების კუთხით;
- საგადასახადო შეღავათების (ფორმა მოსაფიქრებელია) შემოღება იმ ექსპორტიორებისთვის, რომლებიც უახლოეს 3 თვეში დატოვებენ რუსულ ბაზარს და გადაერთვებიან სხვა ბაზრებზე. მსგავსი მოდელის მოძებნა იმპორტიორებისთვისაც;
- აქტიური რეზერვის სისტემის დანერგვა და სწრაფად იმპლემენტაციის დაწყება, რომ თუ რუსეთი ომს დაიწყებს, ცოტა მაინც იყოს საზოგადოება მზად ტერიტორიული თავდაცვისათვის;
- მთავრობის გეგმის შექმნა, რომელიც საგადასახადო, სატრანსპორტო და სხვა ტიპის შეღავათებს დაუწესებს უკრაინიდან დევნილებს;
- რუსეთის მოქალაქეებისთვის დისკრიმინაციულად(!) სამოქალაქო და სხვა სერვისების გაძვირება და ამ თანხების უკრაინის არმიისთვის გადარიცხვა;
- რუსეთის მოქალაქეებზე ქვეყანაში შემოსვლის დროს შემოსვლის ადგილზე მოსაკრებლის დაწესება და ამ თანხის უკრაინის არმიისთვის გადარიცხვა;
- რუსეთის ყოფილი საელჩოს ქუჩისთვის და მოსკოვის გამზირისთვის სახელების გადარქმევა და “უკრაინელი გმირების”, კიევის ან ა.შ. სახელის დარქმევა“, – წერს ფეისბუქის პირად გვერდზე სერგი კაპანაძე.
კომენტარები - დატოვეთ თქვენი მოსაზრება
