ლიეტუვას სეიმის საქართველოსადმი მხარდამჭერ განცხადებასა და ხელისუფლებისადმი მიმართვას, მიხეილ სააკაშვილის სამკურნალოდ ევროპის რომელიმე სახელმწიფოში გადაყვანასთან დაკავშირებით, ეხმაურება ,,მთავარი არხის“ გენერალური დირექტორი ნიკა გვარამია და კონკრეტულ შეფასებებს აკეთებს ამასთან დაკავშირებით:
,,პირველ რიგში მინდა მივესალმო ლიეტუვას სეიმის არჩვეულებრივ გადაწყვეტილებას. კიდევ ერთხელ დაამტკიცა ლიეტუვამ, რომ ჩვენი ერთ-ერთი ყველაზე უფრო ახლო და თანმიმდევრული მოკავშირეა. ასეთი განცხადებები უნდა იყოს ბევრი, მაგრამ ამას სჭირდება მუშაობა, მართლა ყველა კარზე დაკაკუნება. ლიეტუვამ ეს საკუთარი ინიციატივით გააკეთა იმიტომ, რომ უახლოესი მეგობარია ჩვენი, მაგრამ მხოლოდ ჩვენი მეგობრების ცალმხრივ ინიციატივებზე არ უნდა ვიყოთ დამოკიდებული.
ეს არის არაჩვეულებრივი განცხადება, მხარდაჭერა ჩვენი ევროატლანტიკური ინტეგრაციის ცალსახა, მაგრამ არა უპირობო. არის პირობები, მათ შორის ერთ-ერთი და უმნიშვნელოვანესი არის მიხეილ სააკაშვილის გადაყვანა სამკურნალოდ.
ხაზს ვუსვამ იმიტომ, რომ ასეთი ტიპის განცხადებაში არ იყოს მკაფიო და დიპლომატიური ცეცხლი გახსნილი საქართველოს ხელისუფლებისთვის. სავსებით ზომიერად და მე მგონი ყველასთვის მისაღებად, მათ შორის, ხელისუფლებისთვის მისაღებად არის გაკეთებული ზუსტი ჩანაწერი, არც მეტი არც ნაკლები, რომ სააკაშვილი, მისი ჯანმრთელობის მძიმე მდგომარეობის გამო, გადაყვანილ იქნას ევროპის ქვეყანაში სასწრაფოდ სამკურნალოდ. მეტი რაღა უნდა ითქვას?!
უნდა ვიცოდეთ, რომ ჩვენი მხარდამჭერი განცხადებები იქნება ბევრი, მაგრამ ყველაში იქნება ამგვარი დათქმები არა მარტო სააკაშვილზე, ზოგადად. პოლიტიკური მართლმსაჯულება სანამ ქვეყანაში არსებობს, მანამდე იქნება მხარდაჭერა, მაგრამ ყოველთვის იქნება დათქმით.
ეს მხარდაჭერა ბოლოში ვერ გავა. ჩვენს სახელმწიფოს სჭირდება ახლა ევროპული ოჯახი ისე, როგორც არასდროს. ჩვენ გვჭირდება ისინი და არა იმათ ჩვენ – ეს დავიმახსოვროთ“, – განაცხადა ნიკა გვარამიამ.
ავტორი
ნინი ხიჯაკაძე
