ვლადიმერ (ლადო) ბედუკაძის მიერ სოციალურ ქსელში გამოქვეყნებულ პოსტს უმწვავესი შეფასებებით ეხმაურება ტელეკომპანია “მთავარი არხის” გენერალური დირექტორი, ნიკა გვარამია:
“ახლა, რაც არ უნდა იწივლოთ ან სოლიდურად უარყოთ, ამ მახინჯმა ნაძირალამ შემოგახაზინათ 2012-ში ნომერი 41. შემოგახაზინათ და დაღუპეთ ამით ქვეყანა.
ხოდა, გყავდეთ ახლა ჩამოურეცხავ სირცხვილად. ყველას, ჩემს მეგობარსაც და არამეგობარსაც, ჭკვიანსაც და სულელსაც, ახლა უკრაინაზე მგლოვიარე და ქოცების ჩემზე მეტად მაგინებელსაც. აი, ეს ჭუჭყი და ტალახი იყო თქვენი არჩევანის მთავარი შთაგონების წყარო.
ისე, ყველასგან ბოდიშს რომ ითხოვთ, საკუთარ ბოდიშებს ხომ არ მიხედავდით, რამე რომ იყოს? თორემ ისე ღაღადებთ, რომ ოცნება რუსეთია, გეგონება, მე მივედი საკუთარი პასტით, რიგში ჩავდექი და რუსული გეგმა აღვასრულე. ან დადუმდით და სხვებისგან ბოდიშების მოთხოვნას მაინც შეეშვით, ეს ოხერი“, – წერს ფეისბუქის პირად გვერდზე ნიკა გვარამია.
ინფორმაციისთვის – ლადო ბედუკაძემ ფეისბუქის პირად გვერდზე გამოაქვეყნა პოსტი, სადაც, სხვა თავისებურ შეფასებებთან ერთად, საკმაოდ დამაკნინებლად ისაუბრა უკრაინის პრეზიდენტ ვოლოდიმირ ზელენსკიზე, ამასთან უკრაინის ხელისუფლების სარაკეტო იერიშით განადგურების ერთგვარ სურვილსაც გამოხატავს:
“სულ რაღაც 3-4 ახალი სისტემის “კინჯალის” იარაღით, სარაკეტო იერიშია საჭირო და ზელენსკის მთავრობის კვალი – რეზიდენციითურთ არ დარჩება.
არადა, როგორი უშიშარია, ვითარცა უხორცო როგორ თამამად გადაადგილება. ხან ლვოვშია და ხან ბუჩაში.
(სააკაშვილის ღრუბელ-ღრუბელ მალულად ფრენა გამახსენა)
არათუ, სარაკეტო დარტყმა,რუსული დივერსიული ჯგუფი, დესანტიც არ დაძრულა მის გასანადგურებლად. თორემ, დარწმუნებული იყავით ასეთ ფაქტის შემთხვევაში ზელენსკის კივილს მსოფლიო შეიტყობდა“, – წერს ლადო ბედუკაძე.
