პარტია ,,ქართული ოცნება – დემოკრატიული საქართველოს“ თავმჯდომარე ირაკლი კობახიძე იზიარებს პრემიერ-მინისტრის განცხადებას უკრაინის დასჯასთან დაკავშირებით და განმარტავს, რომ დასჯა არსებობს სამართლიანიც და უსამართლოც. მმართველი გუნდის ლიდერის განცხადებით, საუბარია უკრაინის დასჯაზე რუსული სამხედრო აგრესიის სახით, რასაც არ აქვს არავითარი გამართლება:
,,სამწუხაროდ, უკრაინის მიერ მიღებული ზიანი არის უმძიმესი. ის, რაც ხორციელდება სამხედრო აგრესიის სახით რუსეთის მხრიდან უკრაინელების მიმართ არის, რა თქმა უნდა, დასჯის აქტი.
ჩვენ მოვისმინეთ უამრავი სპეკულაცია. სასჯელი შეიძლება იყოს სამართლიანიც და უსამართლოც. ვერავითარი უარყოფითი კონტექსტი ვერ მიეცემა იმ ფრაზას, რომელიც წარმოთქვა პრემიერმა. რა თქმა უნდა, აქ საუბარია უკრაინის დასჯაზე რუსული სამხედრო აგრესიის სახით, რასაც არ აქვს არავითარი გამართლება.
კიდევ ერთხელ გავიმეორებთ, რომ უმძიმესი ზიანი მიადგა, სამწუხაროდ, ჩვენს მეგობარ ქვეყანას, ჩვენს მეგობარ ხალხს, უკრაინას.
ძალიან რთულია ის მდგომარეობა, რომელშიც არის ეს სახელმწიფო დღეს. ყველა თვალსაზრისით, ზიანი იქნება ეს ეკონომიკური, ინფრასტრუქტურული, სამხედრო თუ ნებისმიერი სხვა – არის ძალიან მძიმე.
ასევე, ამ ქვეყანას, მის ხელისუფლებას უკვე მოუწია უარის თქმა NATO-ზე, რაც იყო მისი მხრიდან სასტარტო შეთავაზება, წარმოიდგინეთ, რუსეთის მიმართ.
ბუნებრივია, ჩვენი ამოცანაა, ეს ყველაფერი ავარიდოთ ჩვენს ქვეყანას“, – განაცხადა ირაკლი კობახიძემ.
ავტორი
ნინი ხიჯაკაძე
