საქართველოს მთავრობის შემადგენლობაში ცვლილებებია – მინისტრი დავით ზალკალიანი აშშ-ში საგანგებო და სრულუფლებიანი ელჩად დაინიშნა, ხოლო მის ნაცვლად, საგარეო საქმეთა მინისტრად დაინიშნა მთავრობის ადმინისტრაციის უფროსი, ილია დარჩიაშვილი. აღნიშნულ გადაწყეტილებებთან დაკავშირებით ისაუბრა მთავრობის მეთაურმა, ირაკლი ღარიბაშვილმა:
“მთავრობის შემადგენლობაში ჩვენ კიდევ ერთი ცვლილება განვახორციელეთ და ამის თაობაზე მინდა ვაცნობო საზოგადოებას. ვიცე-პრემიერი და საგარეო საქმეთა მინისტრი, ბატონი დავით ზალკალიანი დაინიშნა საქართველოს საგანგებო და სრულუფლებიან ელჩად ამერიკის შეერთებულ შტატებში.
მინდა, პირველ რიგში დიდი მადლობა გადავუხადო მას გაწეული საქმიანობისთვის. ბატონ დავითს აქვს უზარმაზარი გამოცდილება, იგი 30 წელია ემსახურება ჩვენს ქვეყანას, მის მშობლიურ უწყებას – საგარეო საქმეთა სამინისტროს, სხვადასხვა თანამდებობაზე და ამ 30 წლის განმავლობაში მას პრაქტიკულად ყველა მნიშვნელოვან გადაწყვეტილებაში აქვს მონაწილეობა მიღებული.
ამერიკის შეერთებული შტატები არის ჩვენთვის ყველაზე მნიშვნელოვანი სტრატეგიული პარტნიორი და ბუნებრივია, როცა ჩვენ, ჩვენი მთავრობა ამ საპასუხისმგებლო თანამდებობაზე ნიშნავს ასეთი მდიდარი დიპლომატიური გამოცდილების მქონე კადრს, ამით ყველაფერია ნათქვამი. ჩვენი ამოცანა, ჩვენი სურვილია კიდევ უფრო სხვა ნიშნულზე გადავიყვანოთ ამ ორ ქვეყანას შორის არსებული ურთიერთობები. მე მჯერა, რომ დათო ამას წარმატებით შეძლებს.
რაც შეეხება მის შემცვლელს, საგარეო საქმეთა მინისტრის თანამდებობაზე მინდა წარმოგიდგინოთ მთავრობის ადმინისტრაციის ყოფილი უფროსი, ბატონი ილია დარჩიაშვილი. ილიას აქვს მრავალმხრივი გამოცდილება კერძო სექტორში, საჯარო სექტორში, მას აქვს ბრწყინვალე განათლება, გამოცდილება და მჯერა, რომ ილია წარმატებული საგარეო საქმეთა მინისტრი იქნება.
ჩვენ დღეს ძალიან ბევრი გამოწვევის წინაშე ვდგავართ. ამ სიტუაციაში, ბუნებრივია, საჭიროა აქტიურობა და ჩვენი მთავარი ეროვნული მიზნის მისაღწევად, ამ გზაზე, გვჭირდება შემართებით მუშაობა, ჩვენი ყველა სტრატეგიული მიზნის განხორციელება.
ბატონებო, კიდევ ერთხელ გილოცავთ და გისურვებთ წარმატებებს“, – განაცხადა ირაკლი ღარიბაშვილმა.