თითქმის 4 თვის შემდეგ ისევ იფეთქა დაპირიაპირებამ მმართველი გუნდიდან წასულ და იქ დარჩენილ წევრებს შორის. 4 თვიწ წინ პარლამენტის დეპუტატებს, ეკა ბესელიასა და ვანო ზარდიაშვილს შორის დაპირისპირება მოჰყვა ზარდიაშვილის ბრალდებას, როცა ბესელიას მიმართა – “ეკა, შენ ხელებს ასდის ფულის სუნი“, საპასუხოდ ეკა ბესელიამ ზონდერად მოიხსენია ოპონენტი.
დაპირისპირება ახალი ბრალდებებით განახლდა – ვანო ზარდიაშვილი ეკა ბესელიას, პარტიის ე.წ. “შიდა სამზარეულოდან”, ინფორმაციის გატანას აბრალებს და ვირთხას უწოდებს:
“საზოგადოების შეფასებაა, როდესაც ადამიანს ოჯახიდან, გუნდიდან, რაღაც დახურული წრიდან გააქვს ინფორმაცია, საზოგადოების შეფასება არის ასეთი, რომ მას ეძახიან ვირთხას, ინფორმაციის გამტანს და ა.შ.
გადით ქუჩაში, დაუსვით კითხვები ჩვენს მოქალაქეებს – ასიდან ასივე გიპასუხებთ, რომ თუ ვინმე კორუმპირებულია ქართულ პოლიტიკურ სივრცეში და საჯარო სივრცეში, ეს არის ეკა ბესელია.
ვირთხა, ჩამშვები, ნებისმიერი ეპითეტით, რომლითაც შეგვიძლია იმ შინაარსით შევავსოთ ეკა ბესელია, იგი ყველაფრის ღირსია” – აცხადებს ვანო ზარდიაშვილი.
ვანო ზარდიაშვილი აკონკრეტებს ინფორმაციის გაჟონვის “მექანიზმს”:
„ის ინფორმაციების გაჟონვა, რომელიც “ქართულ ოცნებაში” ხდებოდა ხოლმე, უკვე დადგენილია. ჩემი აზრით უკვე უდავოა ეს ფაქტი. ეს იყო ეკა ბესელია. მას ჰქონდა პირდაპირი კავშირი ნოდარ მელაძესთან, რომლის მეშვეობითაც ჟონავდა ხოლმე უმრავლესობის სხდომებიდან ინფორმაცია”
ვანო ზარდიაშვილის აღნიშნულ ეპითეტებზე მწვავე რეაგირებას ახდენს ეკა ბესელია, აღნიშნულის გამო ეთიკის კომისიისთვის გეგმავს მიმართვას:
“ყველა ზღვარს რომ გადააბიჯებს ადამიანი, ან მისმა პატრონმა უნდა გააჩეროს, თუ ამის გაჩერების უნარი აქვს და, როგორც ჩანს, არ აქვთ უნარი, რომ ვიღაცამ უთხრას ამ ზარდიაშვილს, რომ ეს არის კატასტროფა, რასაც ის კადრულობს. ან მეორე ვერსიაა და მეორე მოცემულობაა, როდესაც არსებობს რაღაც ტიპის სტანდარტი და ამ სტანდარტით მსჯელობს იგივე ეთიკის საბჭო, რისთვისაც ის შეიქმნა. ეს ახალი საბჭოა, შეიძლება დიდი ბერკეტები არა აქვს, მაგრამ რარაცა პრეცედენტები უნდა შეიქმნას – რა არ შეიძლება” – განაცხადა ეკა ბესელიამ.
ამასთან ბესელია კიდევ ერთხელ მიმართავს “ქართულ ოცნებას” და მის ლიდერს, რომელთაც ე.წ. კობახიძის გუნდის მხრიდან სერიოზული პრობლემების შექმნას უწინასწარმეტყველებს:
“ისე, როგორც კობახიძის თაობაზე ვაფრთხილებდი, ახლა ზარდიაშვილ-ოხანაშვილების თაობაზე ვაფრთხილებ, ეს ადამიანები დაღუპავენ ბიძინა ივანიშვილს. ამ მედროვეებს რომ ვერ აღწევს თავს “ქართული ოცნება”, ამიტომაა მისი დრო დასრულებული, ამიტომ დავემშვიდობე მე მათ” – აღნიშნა ეკა ბესელიამ.
