“ეს გადაწყვეტილება არის ტესტი სალომე ზურაბიშვილისთვის – გამოიყენებს თუ არა ვეტოს უფლებას?” – რომან გოცირიძე

ფრაქცია ,,ერთიანი ნაციონალური მოძრაობა – ძალა ერთობაშიას“ წევრი რომან გოცირიძე პოლიტიკურ შეფასებას აკეთებს მმართველი პარტიის მიერ ინიცირებულ კანონპროექტს, საკონსტიტუციო სასამართლოს შესახებ კანონში ცვლილებებთან დაკავშირებით. ოპოზიციონერი ლიდერის განმარტებით, თუ სალომე ზურაბიშვილი გამოიყენებს ვეტოს უფლებას, შეიძლება ჩაითვალოს, რომ საქართველოს პრეზიდენტი საბოლოოდ გაემიჯნა ,,ქართულ ოცნებას“:

,,რა თქმა უნდა, ყველაფერი დაკავშირებულია უკრაინასთან, სალომე ზურაბიშვილის განცხადებებთან. უნდათ ის გააჩუმონ.

აბსურდია, როდესაც კანონში შედის ისეთი ცვლილება, რომელიც პრეზიდენტს უკრძალავს საკუთარი განსხვავებული აზრის გამოთქმის უფლებას.

ეს გადაწყვეტილება, რომელიც ახლა იქნება მიღებული არის ამავე დროს ტესტი ქალბატონი სალომე ზურაბიშვილისთვის – გამოიყენებს თუ არა ვეტოს უფლებას? მოაწერს ხელს, გამოაცხადებს კაპიტულაციას, გამოიყენებს ვეტოს უფლებას, რომლის დაძლევის შანსი არის, რა თქმა უნდა, ოღონდ ეს არ უნდა იყოს საბაბი ამ კანონის ხელმოწერისა, ამ შემთხვევაში, შეიძლება ჩავთვალოთ, რომ ის უკვე საბოლოოდ გაემიჯნა ,,ქართულ ოცნებას“ და ფაქტობრივად მივიღეთ ახალი მარგველაშვილი მისი სახით“, – განაცხადა რომან გოცირიძემ.

ავტორი
ნინი ხიჯაკაძე