რუსეთის ფედერაციის უშიშროების საბჭოს თავმჯდომარის მოადგილე დიმიტრი მედვედევმა რუსეთის საინფორმაციო სააგენტო “რია ნოვოსტი”-სთვის მიცემულ ვრცელ ინტერვიუში ისაუბრა ბირთვული იარაღის გამოყენების თაობაზე, თუ კონკრეტულად რა შემთხვევაში გამოიყენებს რუსეთი ამ იარაღს და დაასახელა 4 პირობა:
“ჩვენ გვაქვს სპეციალური დოკუმენტი, რომელიც ბირთვულ შეკავებას ეხება. ამ დოკუმენტში პირდაპირაა მითითებული ის საფუძვლები, რა შემთხვევაშიც რუსეთის ფედერაცია უფლებამოსილია ბირთვული იარაღი გამოიყენოს და ასეთი საფუძველი რამდენიმეა, შეგახსენებთ:
პირველი – ესაა სიტუაცია, როცა რუსეთზე განხორციელდება ბირთვული განადგურების საშუალების სარაკეტო თავდასხმა;
მეორე შემთხვევა – ეს არის ბირთვული იარაღის ნებისმიერი სხვა სახის გამოყენება რუსეთის ფედერაციის ან მისი მოკავშირეების წინააღმდეგ;
მესამე შემთხვევა – კრიტიკული ინფრასტრუქტურის ისეთი სახის ხელყოფა, რის შედეგადაც მოხდება რუსეთის ბირთვული შეკავების ძალების პარალიზება;
და მეოთხე შემთხვევა – როცა განხორციელდება აგრესიის აქტი რუსეთის ფედერაციის ან მისი მოკავშირეების წინააღმდეგ, რის შედეგადაც საფრთხის ქვეშ დადგება ქვეყნის არსებობა, ბირთვული იარაღის გამოყენების გარეშეც, ანუ ჩვეულებრივი იარაღის გამოყენებით“, – განაცხადა დიმიტრი მედვედევმა.