“ერთიანი ნაციონალური მოძრაობა – ძალა ერთობაშიას” აჭარის წარმომადგენლობამ და რეგიონის ოპოზიციონერმა დეპუტატებმა საგანგებო ბრიფინგი გამართეს, სადაც მოითხოვენ აჭარის ავტონომიური რესპუბლიკის მთავრობის მეთაურის თორნიკე რიჟვაძის გადადგომას უკრაინაში მიმდინარე ომთან მიმართებაში მისი პოზიციის გამო. ამასთან დაკავშირებით სპეციალურ განცხადებას აკეთებს აჭარის უმაღლესი საბჭოს დეპუტატი და ბათუმის მერობის ყოფილი კანდიდატი გიორგი კირთაძე:
,,შეკითხვაზე “ვინ დაიწყო ომი უკრაინაში“, აჭარის ავტონიური რესპუბლიკის მთავრობის თავმჯდომარის და ,,ქართული ოცნების“ პოლიტსაბჭოს წევრს პასუხი არ ჰქონდა. უფრო მეტიც, მან კომენტარში ერთხელაც კი ვერ გაბედა ეთქვა, რომ რუსეთი შეიჭრა უკრაინაში და რუსეთი არის აგრესორი.
ომის დაწყებიდან 2 კვირის შემდეგაც კი თორნიკე რიჟვაძე რუსეთს ოკუპანტად და აგრესორად ვერ ასახელებს. მის facebook გვერდზე გამოქვეყნებული პოსტით ირკვევა, რომ ის 2008 წლის აგვისტოს ომში საკუთარ სამშობლოს, საკუთარ ქვეყანას ადანაშაულებს.
შესაბამისად, მისი ეს განცხადებებიც წინააღმდეგობაშია ქართველი ხალხის და ჩვენი სახელმწიფოს ინტერესთან. მან, რა თქმა უნდა, უნდა დატოვოს აჭარის ავტონომიური რესპუბლიკის მთავრობის თავმჯდომარის პოსტი.
ჩვენ აჭარის უმაღლეს საბჭოში ვიწყებთ პროცედურას მთავრობისათვის უნდობლობის გამოცხადების შესახებ. მოვუწოდებთ ჩვენს კოლეგებს – გამოვიდნენ კომფორტის ზონიდან და თუ ემიჯნებიან თორნიკე რიჟვაძის განცხადებას, რომლის ზეწოლითაც მათ, სამწუხაროდ, ვერ შეძლეს უკვე 2 კვირის განმავლობაში დაინიცირებული რეზოლუციისთვის მხარის დაჭერა, რომელიც უკრაინაში მიმდინარე ომის შეფასებას გულისხმობს, ახლა მაინც ჩამოირეცხონ სირცხვილი და მხარი დაუჭირონ ჩვენს ინიციატივას მთავრობისათვის უნდობლობის გამოცხადების შესახებ“, – განაცხადა გიორგი კირთაძემ.
შეგახსენებთ, რომ აჭარის ავტონომიური რესპუბლიკის მთვარობის თავმჯდომარემ თორნიკე რიჟვაძემ, ჟურნალისტის შეკითხვას, რუსეთ-უკრაინის ომთან დაკავშირებით – თუ ვინ დაიწყო ომი, თავი აარიდა და უპასუხოდ დატოვა.
ავტორი
ნინი ხიჯაკაძე
