“ომია და ნამდვილად არ მინდა უფრო მძიმედ ვისაუბრო ბატონი ზელენსკის მიმართ” – ვახტანგ გომელაური

პარლამენტში, დახურულ ფორმატში, შინაგან საქმეთა მინისტრის მოსმენა გაიმართა. მინისტრმა, ვახტანგ გომელაურმა მედიასთან გაკეთებულ კომენტარში აღნიშნა, რომ საზღვრები კონტროლდება მაღალ დონეზე და არ არის მართალი, რომ უპრეცედენტოდ მოიმატა რუსეთის მოქალაქეების შემოსვლამ საქართველოში:

,,საზღვარი კონტროლდება, რა თქმა უნდა, ძალიან მაღალ დონეზე. უსაფრთოების სამსახურთან ერთად გვაქვს მაქსიმალურად აქცენტი გაკეთებული უსაფრთხოებაზე როგორც ვალეს საზღვარზე, ასევე გამშვებ პუნქტებზე. იყო ხშირი საუბარი, რომ თითქოს და უპრეცედენტოდ მოიმატა რუსეთის მოქალაქეების შემოსვლამ საქართველოში – ეს არ არის მართალი.

ომის დაწყებიდან 24 თებერვალიდან დღემდე, 13 დღის განმავლობაში არის 20 000 ადამიანზე ცოტა მეტი შემოსული, როცა იყო შემოსული 2019 წელს 40 000, ანალოგიურ პერიოდში. აქედან კიდევ ძალიან ბევრი შემოდის მაგალითად, თურქეთის მიმართულებით, ჩრდილოეთ კავკასიის მოსახლეობა – ჩეჩნები, დაღესტანელები, ინგუშები“, – აღნიშნავს ვახტანგ გომელაური.

შინაგან საქმეთა მინისტრი ასევე კომეტარს აკეთებს უკრაინის პრეზიდენტის ვოლოდიმირ ზელენსკის კრიტიკაზე საქართველოს ხელისუფლების მიმართ:

,,ომია და ნამდვილად არ მინდა უფრო მძიმედ ვისაუბრო ბატონი ზელენსკის მიმართ, რაც თქვა, რომ ამორალურია ჩვენი მთავრობის ქმედება. ეს არის მიუღებელი, რა თქმა უნდა, არანაირად ჯდება არც დიპლომატიაში და არც პოლიტიკაში. სამწუხაროა ძალიან.

რაც გააკეთა პრემიერმა, მხარს ვუჭერ. ჩვენ ერთი გუნდი ვართ და ყველაფერი გავაკეთეთ, რაც შეუძლია საქართველოს“, – აცხადებს ვახტანგ გომელაური.

ავტორი
ნინი ხიჯაკაძე