ბრიტანეთის თემთა პალატის, დეპუტატებით სავსე დარბაზის წინაშე გამოსვლისას, რაც ონლაინ-ჩართვით მოხდა, უკრაინის პრეზიდენტმა ვოლოდიმირ ზელენსკიმ ისაუბრა უკრაინაში მიმდინარე ომის შესახებ, იმ ტრაგიკული ფაქტების თაობაზე, რასაც ადგილი აქვს რუსეთის აგრესიის გამო. აღნიშნულ გამოსვლას ემოციური პოსტით გამოეხმაურა ბრიტანეთის პრემიერ მინისტრი ბორის ჯონსონი:
“პარლამენტის მრავალსაუკუნოვან ისტორიაში, თემთა პალატას არასოდეს მოუსმენია ისეთი მიმართვა, როგორც მიმართა პრეზიდენტმა ზელენსკიმ.
ჩვენ გამოვიყენებთ ყველა მეთოდს, რაც შეგვიძლია, რა დროც არ უნდა დასჭირდეს, რომ პუტინის შეჭრა წარუმატებელი იყოს და უკრაინა კვლავ თავისუფალი იყოს”, – წერს ჯონსონი.
ინფორმაციისთვის – ზელენსკის ტკივილით და ემოციით აღსავსე გამოსვლიდან:
“გავაგრძელებთ ბრძოლას ჩვენი მიწისთვის, რადაც არ უნდა დაგვიჯდეს – ვიბრძოლებთ ტყეებში, მინდვრებში, სანაპიროებსა და ქუჩებში…
უკრაინა არ დანებდება!
ჩვენ არ დავმარცხდებით, ჩვენ არ გვინდა დავკარგოთ ის, რაც გვაქვს, რაც ჩვენია – ჩვენი ქვეყანა, უკრაინა“, – აცხადებს ვოლოდიმირ ზელენსკი.
უკრაინის პრეზიდენტი ბრიტანელებს უკრაინის ცის დაკეტვას სთხოვს.
“გთხოვთ, უზრუნველყავით, რომ ჩვენი უკრაინული ცა უსაფრთხო იყოს. უზრუნველყავით იმის გაკეთება, რისი გაკეთებაც აუცილებელია” – მიმართა ზელენსკიმ.