“უკრაინაში უნდა გამგზავრება, რომ მხარში დაუდგეს უკრაინელებს” – მეუფე ნიკოლოზი მიხეილ სააკაშვილზე

ახალქალაქის, კუმურდოს და კარის მიტროპოლიტი მეუფე ნიკოლოზი (ფაჩუაშვილი) საქართველოს მე-3 პრეზიდენტის მონახულების შემდეგ კომენტარს აკეთებს და აცხადებს, რომ მიხეილ სააკაშვილმა გადაიტანა კოვიდი, თუმცა ახლა კარგად არის. ასევე დიდი იმედი აქვს, რომ გაათავისუფლებენ და აქვს უკრაინაში წასვლის სურვილი:

,,როგორც ჩანს კოვიდი გადაიტანა და ახლა კარგად არის, მაგ მხრივ. მსუბუქი ფორმებით ხდება, ეგეთია ბოლო შტამი და უკვე გამოჯანმრთელებულია.

მარხვა დაიწყო და მიუხედავად იმისა, რომ მას შიმშილობა აქვს გამოცხადებული და ეს ის თემა არაა, რაშიც მე ჩავერევი, ეს პოლიტიკურია, მისი პროტესტის ფორმაა, მაგრამ მარხვაა ახლა და ის  დღეიდან იწყებს მარხვას. 

მთლიანად გადართული არის უკრაინის საკითხზე. შესაბამისად, რაღაც მებრძოლის შინაგანი განწყობა აქვს და ასეთი რაღაც მითხრა, რომ უკრაინელები ძალიან ელოდებიან მის განთავისუფლებას და დიდი იმედი აქვს, რომ მოხერხდება მისი გათავისუფლება. უკრაინაში უნდა გამგზავრება, რომ მხარში დაუდგეს მათ.

საშინელი კატასტროფაა ეს ომი. ჯვარი გვწერია, რომ არ შეგვეხოს, მაგრამ აუცილებლად შეგვეხება. შეიძლება ბომბები არ ჩამოგვიყარონ ქვეყანაში, მაგრამ ყოველ შემთხვევაში ეს ეკონომიკური კრიზისი, ფსიქოლოგიური წნეხი აუცილებლად შეგვეხება“, – განაცხადა მეუფე ნიკოლოზმა.

ავტორი
ნინი ხიჯაკაძე