“სტრატეგია აღმაშენებლის” თავმჯდომარე უკრაინელი ხალხისთვის სოლიდარობისა და მხარდაჭერის გამოხატვის მიზნით კიევში იმყოფება. ოპოზიციონერმა ლიდერმა “Live”-ჩართვისას მწვავე შეფასებები მისცა რუსეთის აგრესიას სუვერენული სახელმწიფოს წინააღმდეგ:
,,ვიმყოფები კიევში. სიტუაცია საკმაოდ მძიმეა. სამწუხაროდ რუსეთმა გადაწყვიტა ფართომასშტაბიანი აგრესიული ომის წამოწყება უკრაინის წინააღმდეგ. ყველას უნდა გვესმოდეს, რომ ეს არ არის ომი მხოლოდ უკრაინის წინააღმდეგ, ეს ეხება საქართველოს და მთელ ცივილიზებულ სამყაროს. ფაქტობრივად უნდათ რომ დაარღვიონ ყველა ის უსაფრთხოების სტანდარტის სისტემა.
უკრაინული ჯარი მაქსიმუმს აკეთებს იმისთვის, რომ დაიცვას თავისი ქვეყნის სუვერენიტეტი. ჩვენი ინფორმაციით, დონბასის მიმართულებით საკმაოდ დიდი წინააღმდეგობა დახვდა რუსეთს, მაგრამ ბელორუსის მხრიდან უფრო აქტიურად მოიწევს რუსული ჯარი. აბსოლუტური მობილიზაციაა გამოცხადებული უკრაინაში. იმედი მაქვს, რომ ჩვენი საერთო ძალისხმევით სწრაფად შეჩერდება ეს აგრესია, ეს ომი.
საგანგებო სესიის გამართვის თაობაზე გავიგე და გულწრფელად მოვუწოდებ ჩემს კოლეგებს პარლამენტში, რომ აუცილებელია საქართველომ ერთიანობა ვაჩვენოთ, მშვიდობისკენ მოვუწოდოთ აბსოლუტურად ყველას.
დარწმუნებული ვარ, რომ ჩვენი დასავლელი მეგობრებიც ძალიან სწრაფად აამოქმედებენ ბევრ მექანიზმს.
დღეს ერთხელ და სამუდამოდ დაინახა მსოფლიომ, რომ ასეთი რუსეთი ეს არის მთავარი საფრთხე მსოფლიოსი. მასთან საუბარი, როგორც ჩანს, შეუძლებელია. ისინი ყველა შეთანხმებას თავისებურად განმარტავენ.
ძალიან მნიშვნელოვანია, რომ ვიყოთ ერთიანები. მოვუწოდოთ მშვიდობისკენ. ნებისმიერი ადამიანის სიცოცხლე არის ძალიან ძვირფასი.
მე იმედი მაქვს, რომ ეს სიგიჟე, რა სიგიჟეშიც ახლა ვიმყოფებით ვერავის წარმოგვედგინა ასეთი რამ, რაც შეიძლება სწრაფად შეწყდება და დამთავრდება.
მე იმედი მაქვს, რომ უკრაინა ძალიან მალე დაიბრუნებს კონტროლს მთელს ტერიტორიაზე. ძალიან მალე ამოქმედდება ყველა ის მექანიზმი, რომელიც დაიცავს მშვიდობისთვის და თავისუფალი მისთვის მებრძოლ ყველა ადამიანს, გმირს“, – განაცხადა გიორგი ვაშაძემ.
ავტორი
ნინი ხიჯაკაძე
