“არჩევანი მარტივია – ან რუსეთის ჩექმის ქვეშ მოქცეული, დამონებული ქვეყანა ან თავისუფალი, განვითარებული, დასავლური უსაფრთხოების სისტემაში ინტეგრირებული საქართველო” – პარტია “სტრატეგია აღმაშენებელი”

რუსეთის აგრესიულ პოლიტიკასთან და ვლადიმერ პუტინის მიერ გუშინ გაკეთებულ განცხადებასთან დაკავშირებით პარტია “სტრატეგია აღმაშენებელი” სპეციალურ განცხადებას ავრცელებს:

“სამწუხაროა, რომ რუსეთის ფედერაცია ვერ ელევა თავის იმპერიულ ამბიციებს, ვერ ეგუება მის მეზობლად სუვერენული სახელმწიფოებისა და თავისუფალი ერების არსებობას, თავს ესხმის მათ, უხეშად არღვევს საერთაშორისო სამართლის ნორმებს, ადამიანის ფუნდამენტურ უფლებებს ისევე, როგორც ამას აკეთებდა 2008 წლის აგრესიის დროს აფხაზეთისა და ცხინვალის რეგიონებში.

საჭიროა ეფექტური და სწრაფი რეაგირება დასავლელი პარტნიორების მხრიდან. ამასთან, ჩვენ არ უნდა ვიყოთ მხოლოდ დასავლეთის იმედად და აუცილებელია ეროვნული ერთიანობა რუსეთის აგრესიის წინააღმდეგ, რადგან მტერმა იცოდეს, რომ როგორც უკრაინაში, ისე საქართველოში, შესაბამის პასუხს გასცემენ და მოუწევს დიდი ფასის გადახდა!

არჩევანი მარტივია – ან რუსეთის ჩექმის ქვეშ მოქცეული, დამონებული ქვეყანა ან თავისუფალი, განვითარებული, დასავლური უსაფრთხოების სისტემაში ინტეგრირებული საქართველო.

უკრაინა და საქართველო არავის ესხმის თავს, რადგან ჩვენს ქვეყნებს ახლა ყველაზე მეტად სჭირდება მშვიდობა, თავისუფლება და განვითარება!“ – ნათქვამია გავრცელებულ განცხადებაში.

ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს