“ლეიბორისტული პარტია” და პირადად მე ივანიშვილის პოლიტიკურ საფლავზე დავადგამთ დიდ ქვას, რომ იქიდან არასოდეს პატარა ბიძინებიც კი აღარ ამოძვრნენ და საქართველოს მომავალი არ გაანულონ!” – შალვა ნათელაშვილი

,,ლეიბორისტული პარტიის” თავმჯდომარე შალვა ნათელაშვილი მწვავე შეფასებას აკეთებს საპარლამენტო მანდატების შეწყვეტასთან დაკავშირებით მმართველი პარტიის გადაწყვეტილების გამო:

,,ოლიგარქი ივანიშვილის პირადი დიქტატურა იღებს უპრეცედენტო სახეს. მსოფლიო პარლამენტარიზმის ისტორიაში პირველად სადეპუტატო უფლებამოსილებას წყვეტს პარლამენტი იმის გამო, რომ წელს გამოცხადებული აქვს პოლიტიკური ბოიკოტი გაყალბების და ძალაუფლების მიტაცებასთან დაკავშირებით.

ასეთი რამ არცერთ ეპოქაში, არც ერთ ქვეყანაში არ მომხდარა და რა თქმა უნდა, ჩვენ ამ გადაწყვეტილებას ველოდებოდით.

ხომ ნახეთ, როგორ ეშინიათ ჩვენი?! როგორ ეშინიათ ერთი დეპუტატის და ამის შემდეგ ვინმე დაიჯერებს, რომ ,,ლეიბორისტულ პარტიას” ივანიშვილი ფრაქციის სახით შეუშვებდა იქ?! – არ გააყალბებდა არჩევნებს, არ მოახდენდა მასობრივ ფალსიფიცირებას და არ მისცემდა დავალებას, რომ ჩვენი ფეხი პარლამენტში არ ყოფილიყო?!

სანამ ეგონათ, რომ იქ არ შევიდოდით, რომ ბოიკოტს გავაგრძელებდი 4 წელი, მანამდე გაცდენები მიდიოდა საპატიოდ, უარიც მითხრეს უფლებამოსილების შეწყვეტაზე, დადგენილებით. როგორც კი გაიგეს, რომ ჩვენ დავიწყეთ გამოკითხვა მოსახლეობაში შესვლა/არშესვლაზე, ისე რომ გადაწყვეტილება არც გვაქვს მიღებული, იმავე წუთს გამოგვეხმაურნენ უფლებამოსილების შეწყვეტით. ამჯერად საპროცედურო კომიტეტის დონეზე და აპირებენ პარლამენტში ამის გატანას.

ისე იქნება თუ ასე იქნება, ,,ლეიბორისტული” პარტია და პირადად მე, ივანიშვილის პოლიტიკურ საფლავზე დავადგამთ დიდ ქვას, რომ იქიდან არასოდეს პატარა ბიძინებიც კი აღარ ამოძვრნენ და საქართველოს მომავალი არ დაღუპონ.

აი ამას ვპირდები აქედან ოლიგარქს, რომელმაც ძალიან კარგად იცის, რომ ჩვენი პარლამენტში შესვლის შემთხვევაში პირველი საკითხი, რაც იქნება ქვეყნისთვის და მსოფლიოსთვის გასაგონად ნათქვამი – ეს ივანიშვილის დანაშაულებრივი საქმიანობის შემსწავლელი კომისიის შექმნაა”, – განაცხადა შალვა ნათელაშვილმა.

ავტორი
ნინი ხიჯაკაძე