,,მთავარი არხის“ გენერალურმა დირექტორმა ნიკა გვარამიამ, საქართველოს მე-3 პრეზიდენტის მონახულების შემდეგ, პატიმრის ჯანმრთელობის მდგომარეობასთან დაკავშირებით განმარტებები გააკეთა და განაცხადა, რომ აუცილებელია მიხეილ სააკაშვლის რეაბილიტაციის პროცესის გაგრძელება საზღვარგარეთ:
,,ჯანმრთელობის მდგომარეობა უცვლელია – პრობლემური. ჩანს მეხსიერებაში ჩავარდნები და ა.შ. მე არ გავაგრძელებ – ამაზე ექიმები საუბრობენ მუდმივად, რომ მას სჭირდება მკურნალობა არა საქართველოს პენიტენციურ დაწესებულებებში. იმიტომ, რომ ჯერ ერთი – ეს არის მისი წამების ადგილი და მეორე – ის საჭიროებები, რომელიც მიხეილ სააკაშვილისთვის მნიშვნელოვანია, სამედიცინო საშუალებებს ვგულისხმობ, აქ უბრალოდ არ არის.
ამიტომ ეს ადამიანი აქედან უნდა გამოვიდეს და მოხდეს მისი გადაყვანა სხვა ქვეყანაში, რეაბილიტაციის მიზნით. გუშინ ამაზე განცხადება გააკეთა უკრაინის პარლამენტის მართველი პარტიის ლიდერმა, მოგეხსენებათ და ჩვენ სრულიად ვიზიარებთ ამ დამოკიდებულებას.
მეორე, რაც შეეხება გორის ჰოსპიტალის დღევანდელ განცხადებას, ეს განცხადება არის აბსოლუტური მტკნარი სიცრუე, მეტიც სააკაშვილის განცხადებით ბატონი ღონიაშვილი თავად იყო ე.წ. საათის ინციდენტის მონაწილე და ბუნებრივია, რომ პირადი ინტერესებიდან გამომდინარე წაშალა საკუთარი დანაშაულის კვალი. ჩვენ ამ კვალს მაინც აღმოვაჩენთ და ღონიაშვილი ამაზე პასუხს აგებს.
ქალბატონი აბაშიძე, რომელმაც სრულიად კვალიფიციური და მიუკერძოებელი ნევროლოგიური დასკვნა გააკეთა მიხეილ სააკაშვილის მდგომარეობაზე, რაც პრაქტიკულად იმეორებდა სახალხო დამცველის კონსილიუმის და ასევე ,,ემპათიის“ დასკვნებს, გახდა ანგარიშსწორების საგანი. მისი მეუღლე გაუშვეს ჯანდაცვის სამინისტროს დეპარტამენტის ხელმძღვანელობიდან.
კარგად ჩანს როგორი ორკესტრირებულია მიხეილ სააკაშვილის ირგვლივ ყველაფერი, აბსოლუტურად ყველა ქმედება, მათ შორის ექიმების კეთილსინდისიერების გამო როგორ ისჯებიან ისინი. ამას ჩვენ ვხედავთ. ეს ყველაფერი ერთ წრეში იკვრება, რასაც ჰქვია სააკაშვილის წამება და ყველა იმ ადამიანის დასჯა, სახელმწიფო მოხელეებისაც მათ შორის, ვინც ამას სწორად და მიუკერძოებლად ასახავს“, – განაცხადა ნიკა გვარამიამ.
ავტორი
ნინი ხიჯაკაძე
