“სტრატეგია აღმაშენებლის” პოლიტსაბჭოს წევრი, განათლების მიმართულების ხელმძღვანელი ნანა ტოხვაძე, სკოლებში, მასწავლებლებს შორის გაჩენილი უსამართლობის განცდის თაობაზე საუბრობს და კონკრეტულ შეფასებებს აკეთებს:
“პოლიტიკურ ხავსად ქცეულმა მასწავლებელთა სქემამ გააღრმავა უსამართლობის შეგრძნება სტატუსიან თუ უსტატუსო მასწავლებლებში. ასეულობით შეტყობინება მოგვდის ყოველდღიურად და თითოეული წერილის ავტორს თავისი წილი სიმართლე აქვს. როგორც გამოცდაჩაბარებული, ასევე სკოლის გარეთ დარჩენილი მასწავლებლები წუხან სამინისტროსგან მიყენებული ზიანის გამო და თავს მოტყუებულად თვლიან.
სამწუხაროდ, ხელისუფლების მიერ სკოლა და მთლიანად სასკოლო საზოგადოება საარჩევნო ინსტრუმენტად გამოიყენება. ის რომ სკოლას ჭირდება კვალიფიციური მასწავლებელი ეს საკამათო არ არის, მაგრამ განათლების სამინისტრომ ამ პოზიციიდან მაშინ გადაუხვია, როდესაც 2015 წლის 20 თებერვლის მთავრობის #68 დადგენილება გვერდზე გადადო და მასწავლებელთათვის კვალიფიკაციის ამაღლების 2019 წლამდე მიცემული ვადები გაახანგრძლივა. მიზეზი ცხადია, რომ პოლიტიკური ძალაუფლების შენარჩუნების ცდუნება იყო. 2020 წლისა თუ 2021 წელს საარჩევნოდ მისაღები ბენეფიტები უფრო მნიშვნელოვნად მიიჩნიეს, ვიდრე სკოლის გაჯანსაღება და კომპეტენტური კადრებით დაკომპლექტება.
ხოლო 2021 წლის მცდელობა, რომ შუა სასწავლო წელს პრაქტიკოსი მასწავლებელთათვის ხელშეკრულების შეეწყვეტათ, არ გახლდათ განათლების მიზნებით ნაკარნახევი. მიზეზი მარტივია – მორიგ არჩევნებს ხელისუფლება 2024 წლამდე არ გეგმავს“, – აცხადებს ნანა ტოხვაძე.