საქართველოს განათლების მინისტრს კონკრეტული შეკითხვით მიმართავს პარტია “სტრატეგია აღმაშენებლის” პოლიტსაბჭოს წევრი, განათლების მიმართულების ხელმძღვანელი ნანა ტოხვაძე და აცხადებს, რომ განათლების სამინისტრომ თავისი არასწორი პოლიტიკით წყალში ჩაყარა მილიონობით ლარი:
“გაამართლა თუ არა საკმაოდ ძვირადღირებულმა პროექტმა „ტელესკოლამ“?
ამ კითხვას ჯერ კიდევ 2020 წლის მარტში ვუსვამდით ბატონ მონისტრს. თუმცა, მაშინ სიამაყით აცხადებდა, რომ BBC-ზე ადრე დაიწყო ჩვენმა საზოგადოებრივმა მაუწყებელმა დისტანციური სასწავლო რესურსის გაშუქება.
ცხადია, თავისთავად პროექტი კარგი წამოწყებაა, როგორც დამატებითი საგანმანათლებლო-შემეცნებითი პროგრამა, მაგრამ საკლასო განათლების ალტერნატიულ ინსტრუმენტად მოაზრება იმთავითვე შეცდომა იყო.
განათლების სამინისტროს საზოგადოებისთვის არ წარმოუდგენია არცერთი პარამეტრი პროექტის ეფექტიანობაზე. თითქმის 2 წლისთავზეც უცნობია, რამდენად ხელმისაწვდომი იყო ეს რესურსი მოსწავლეთათვის, მთელი ქვეყნის მასშტაბით ან მოსწავლეთა რამდენი პროცენტი იყენებდა აქტიურად.
როგორც ცნობილია, განათლების კომიტეტმა შექმნა სასკოლო განათლებაზე პანდემიის გავლენის მოკვლევის ჯგუფი, რომლის ანგარიში 14 იანვარს გასაჯაროვდა. ხანგრძლივი და მრავალკომპონენტიანი მოკვლევით გამოვლინდა, რომ ტელესკოლის ეფექტიანობაზე დამაჯერებელი საფუძვლები არ არსებობს.
ამდენად, ერთი პრობლემაა სახელმწიფო ბიუჯეტიდან წყალში გადაყრილი მილიონობით ლარი, ხოლო მეორე კიდევ უფრო მწვავე საკითხია მოსწავლეთა აკადემიური ჩამორჩენა, დისტანციური სწავლებისას.
ცხადია, ბ-ნ ჩხენკელ მეხოტბეს გამბედაობა უნდა ეყოს და აღიაროს პროექტის ჩაფლავება, რითაც უმიზეზოდ ყოყოჩობდა“, – აცხადებს ნანა ტოხვაძე.
