“სტრატეგია აღმაშენებლის” თავმჯდომარე ზღვისუბანში მომხდარ შემზარავ ტრაგედიას ეხმაურება და გარდაცვლილის ოჯახის წევრებსა და ახლობლებს უსამძიმრებს. გიორგი ვაშაძის თქმით აღნიშნული ფაქტი ხელისუფლების დაუდევრობის და უმოქმედობის ბრალია. ვაშაძე ხელისუფლებასა და ჯანდაცვის სამინისტროს მიმართავს, რომ დაუყოვნებლივ აღმოუჩინონ შესაბამისი დახმარება ავარიულ შენობაში, სანოტორიუმ “ქართლში” მცხოვრებ უკლებლივ ყველა ოჯახს:
“ვუსამძიმრებ ზღვისუბანში გარდაცვლილი მამაკაცის ახლობლებსა და ოჯახის წევრებს.
კიდევ ერთი ტრაგედია ხელისუფლების დაუდევრობით და უმოქმედობით!
130 ოჯახი რახანია ითხოვს, საცხოვრებლად საშიში პირობებიდან გამომდინარე, ფართებით უზრუნველყოფას, თუმცა, ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა, ზურაბ აზარაშვილმა, მათ არათუ პასუხი ვერ გასცა, ინტერესიც კი არ გამოუჩენია ამ უმწვავესი პრობლემის მიმართ.
დღეს ვიგებთ, რომ ერთ-ერთმა დევნილმა მოსახლემ სიცოცხლე თვითმკვლელობით დაასრულა.
მთავრობას ხალხის ხმა არ ესმის, არ ესმის დევნილების ხმა და ადამიანები იძულებულები არიან, შემზარავი და სავალალო გადაწყვეტილებები მიიღონ.
კიდევ რამდენი ადამიანის სიცოცხლე უნდა შეეწიროს თქვენს უპასუხისმგებლობას და უყურადღებობას?!
საკმარისია! დრულად აღმოუჩინეთ სათანადო დახმარება ყველა ოჯახს!“ – განაცხადა გიორგი ვაშაძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური.
