,,მთავარი არხის“ გენერალური დირექტორი ნიკა გვარამია საქართველოს მე-3 პრეზიდენტთან შეხვედრის შემდეგ კონკრეტულ განმარტებებს აკეთებს. მისი განცხადებით, მიხეილ სააკაშვილი ამ ეტაპზე არის საკმაოდ სუსტად იმის მიუხედავად, რომ არ შიმშლობს და გამომწვევი ფაქტორი არის ფსიქოლოგიური ტრავმა:
,,საკითხები, რომლებზეც ვისაუბრეთ, მე არ ვაპირებ საჯაროდ ამის განხილვას. ჩვენთვის ძალიან მნიშვნელოვანია მისი მდგომარეობა. ის არის სუსტად. კიდევ ერთხელ ვამბობ, რომ სამედიცინო მიმართულებით კომენტარებს არ გავაკეთებ, მე შემიძლია გითხრათ რას ვხედავ: ის არის სუსტად და წონაში დაკლებული და მნიშვნელოვნად დაეტყობა ეს ყველაფერი. ცხადია, არ შიმშლობს, მაგრამ ვერ ჭამს დაახლოებით ¾-ზე მეტს პრაქტიკულად ვერ ითვისებს საკვებს. ეს, რა თქმა უნდა, არის ფსიქოლოგიური ტრავმის შედეგი.
ის სუსტად არის, თუმცა ფიქრობს 23-ში სასამართლოზე მისვლას, მაგრამ პირადად ჩემი პოზიცია იყო, რომ ამ ვითარებაში, თუ ის ასე იქნება ჯობია, რომ ამისგან თავი შეიკავოს – რა მიზანიც არ უნდა ჰქონდეს. გასაგებია, რა მიზანიც აქვს ამას ყველაფერს, მაგრამ ახლა მის სიცოცხლეზე უფრო დიდი მიზანი, ჩემი აზრით, არ არსებობს.
იგი მიესალმება რეკონსილაციის პროცესს, მიესალმება სალომე ზურაბიშვილის მიერ წამოწყებულ, ასე ვთქვათ, კამპანიას, თუმცა ელოდება როგორი გაგრძელება ექნება ამას ყველაფერს იმიტომ, რომ როგორც ჩვენი კლასიკოსი ამბობდა – ,,თვინიერ საქმეთა სიტყვა მკვდარ არს“. ასევე, იგი მიესალმება იმას, რომ პირველად ხელისუფლების მხრიდან აღიარებულ იქნა უმძიმესი კრიზისი ქვეყანაში, ყველა მიმართულებით.
მაგრამ რეკონსილაციის პარალელურად იგი მიიჩნევს, რომ მნიშვნელოვანია ძალიან ხალხმრავალი, მშვიდობიანი პროტესტი. ამიტომ ის თვლის, რომ 21 დეკემბერს ძალიან მნიშნელოვანია ბევრი ადამიანი შეიკრიბოს და მშვიდობიანად დააფიქსირონ საკუთარი მოთხოვნები. ის ამას მიიჩნევს სავსებით თავსებადად რეკონსილაციის პროცესთან და პირიქით თვლის, ეს კიდევ უფრო დააჩქარებს რეკონსილაციის პროცესს და სწორ გადაწყვეტილებებს საზოგადოების შერიგების თვალსაზრისით“, – განაცხადა ნიკა გვარამიამ.
ავტორი
ნინი ხიჯაკაძე
