“სწორ გადაწყვეტილებად მივიჩნიეთ, რომ შემდეგი ჩემი საქმიანობა გავაგრძელო პარტია “ქართულ ოცნებაში” – პოლიტსაბჭოში” – ეკატერინე ტიკარაძე

პარტის “ქართული ოცნების” ცენტრალურ ოფისში ბრიფინგი გამართა დევნილთა,შრომის, ჯანმრთელობისა და სოციალური დაცვის მინისტრმა, სადაც გადადგომის თაობაზე განცხადება გააკეთა:

“მადლობა მინდა გადავუხადო სამედიცინო საზოგადოებას და ყველას, ვინც პანდემიის პერიოდში ჩემთან ერთად დაუღალავად იბრძოდა თითოეული მოქალაქის ჯანმრთელობისათვის. ასევე მადლობა მინდა გადავუხადო ჩვენს თითოეულ მოქალაქეს, ვინც გაგებით ეკიდებოდა ყველა იმ გადაწყვეტილება, რომელსაც ჯანდაცვის სისტემაში ჩვენ ვიღებდით.

მინდა მადლობა გადავუხადო ჯანდაცვის სამინისტროს გუნდს, რომელიც განსაკუთრებით ბოლო 2 წლის განმავლობაში, პანდემიის პირობებში დაუღალავად ებრძოდა იმ უხილავ მტერს, რომელმაც შეიწირა ჩვენი მოქალაქეების სიცოცხლე.

ჩემთვის ჯანდაცვის მინისტრობა იყო და არის ძალიან დიდი პასუხისმგებლობა. განვლილ პერიოდში ყველაფერი გავაკეთეთ იმისათვის, რომ გადაგვედგა ღირსეული და სწორი ნაბიჯები. ჩვენი ყველა ქმედება და ნაბიჯები მიმართული იყო მხოლოდ ქვეყნისა და ჩვენი მოქალაქეების საუკეთესო ჯანმრთელობისათვის.

სამწლიანი, საკმაოდ ინტენსიური მუშაობის შემდეგ, გავლილი კონსულტაციების შედეგად, როგორც პრემიერთან და ახლა უკვე პარტიის თავმჯდომარესთან, სწორ გადაწყვეტილებად მივიჩნიეთ, რომ შემდეგი ჩემი საქმიანობა გავაგრძელო პარტია “ქართულ ოცნებაში” – პოლიტსაბჭოში და სწორედ აქედან გავამყარო და გავაძლიერო ქართული ჯანდაცვისა და სოციალური დაცვის სისტემები“, – განაცხადა ეკატერინე ტიკარაძემ.