“გვექნება ჩვენი შესაბამისი დასკვნა, რომელიც მხარეს შეუძლია გამოიყენოს სამართალწარმოების დროს სტრასბურგის სასამართლოში” – ნინო ლომჯარია

სახალხო დამცველმა ნინო ლომჯარიამ კომენტარი გააკეთა საქართველოს მე-3 პრეზიდენტთან დაგეგმილ მორიგ ვიზიტთან დაკავშირებით და აღნიშნა, რომ კონსილიუმს დაემატება სხვა დარგის სპეციალისტებიც, რომლებიც შეისწავლიან მიხეილ სააკაშვილის სამედიცინო ჩანაწერებს და წარმოადგენენ შესაბამის დასკვნას:

,,კონსილიუმმა და მეც ბოლო ვიზიტი მიხეილ სააკაშვილთან განვახორციელეთ 23 ნოემბერს. უახლოეს დღეებში იგეგმება სახალხო დამცველის სამედიცინო კონსილიუმის ვიზიტი, მონიტორინგის მიზნით, გორის საავადმყოფოში.

ჩვენ დავამატებთ სხვა დარგის სპეციალისტებსაც – შესაბამისი მიმართულებებით, რადგან უკვე ახალი, ესე ვთქვათ, მიმართულებით გამოიკვეთა პრობლემები. მათ შორის, სავარაუდოდ, ფსიქიკური – ჯანდაცვის მიმართულებით.

ამიტომ ამ საკითხებს ჯერ შევისწავლით ანუ ვნახავთ სამედიცინო ჩანაწერებს, იგივე დოზირების საკითხებს, თუ რამდენად მართებულად წარიმართა მისი მკურნალობა ამ მიმართულებით. გვექნება ჩვენი შესაბამისი დასკვნა, რომელიც, რა თქმა უნდა, მხარეს შეუძლია გამოიყენოს სამართალწარმოების დროს სტრასბურგის სასამართლოში“, – განაცხადა ნინო ლომჯარიამ.

ავტორი
ნინი ხიჯაკაძე