საქართველოს სხვადასხვა რეგიონებიდან ჩამოსულმა მასწავლებლებმა დღეს პარლამენტთან საპროტესტო აქცია გამართეს. მათი მთავარი მოთხოვნა იმ 5000-ზე მეტი მასწავლებლის სკოლაში დარჩენა იყო, რომლებსაც პრემიერ-მინისტრის დადგენილებით 15 იანვრიდან სკოლებს ატოვებინებენ.
“რა გააკეთა სახელმწიფომ იმისთვის, რომ პრაქტიკოს მასწავლებლებს მიეღოთ შესაბამისი გადამზადება და მომზადებული შეხვედროდნენ ბოლო შანსს“, – ასე ეხმაურება “სტრატეგია აღმაშენებლის” განათლების მიმართულების ხელმძღვანელი ნანა ტოხვაძე პარლამენტთან შეკრებილი აქტივისტების მოთხოვნას. ტოხვაძის თქმით, როგორც 2020 წელს, ასევე 2021 წელს აქციაზე მყოფი მასწავლებლების რესურსი გამოყენებული იქნა იმისთვის, რომ მმართველ ძალას პოლიტიკური ძალაუფლება შეენარჩუნებინა
“მთავარი მოთხოვნა არის სრულიად სამართლიანი. 2020 წლის წინასაარჩევნო პერიოდში მათ მისცეს იმედიანი სიტყვა, რომ დატოვებდნენ სასკოლო სისტემაში, 2021 წელსაც გამოიყენეს მათი რესურსი, როგორც მასწავლებლების იმისთვის, რომ პოლიტიკური ძალაუფლება შეენარჩუნებინათ და დღეს “ქართული ოცნება” მათ პასუხის გარეშე უშვებს სკოლიდან.
რა თქმა უნდა, ამ ადამიანებისთვის გამოცდის ჩაბარება რომ აუცილებელი იყო ეს ჩვენთვის ცხადია მაგრამ არის შეკითხვა – რა გააკეთა სახელმწიფომ იმისთვის, რომ პრაქტიკოს მასწავლებლებს მიეღოთ შესაბამისი გადამზადება და მომზადებული შეხვედროდნენ ბოლო შანსს, რათა 20-25 წლიანი საქმიანობის შემდეგ ასე უცერემონიოდ არ გაეშვათ სკოლებიდან?”, – განაცხადა ნანა ტოხვაძემ.
ინფორმაციას პოლიტიკური პლატფორმა “გიორგი ვაშაძე – სტრატეგია აღმაშენებლის” მედიასთან და საზოგადოებასთან ურთიერთობის სამსახური ავრცელებს
