“პრეზიდენტმა მითხრა, რომ ის ნამდვილად შეწყვეტს მკურნალობას ხვალ დილიდან თუ არ შეუშვებენ დეპუტატებს – ეს იქნება კატასტროფა!” – ნიკოლოზ ყიფშიძე

პაციენტის მონახულების შემდეგ, მიხეილ სააკაშვილის პირადმა ექიმმა ნიკოლოზ ყიფშიძემ ჟურნალისტებს გააცნო საქართველოს მე-3 პრეზიდენტის გადაწყვეტილება იმასთან დაკავშირებით, რომ იმ შემთხვევაში, თუ მასთან დეპუტატებს არ შეუშვებენ, მკურნალობას შეწყვეტს:

,,პრეზიდენტმა კიდევ ერთხელ მითხრა, რომ ის ნამდვილად შეწყვეტს მკურნალობას ხვალ დილიდან, თუ არ შეუშვებენ დეპუტატებს – ეს იქნება კატასტროფა!

პირდაპირ გეუბნებით, მაშინ თავიდან უნდა დავიწყთ ყველაფერი. მაგრამ ასევე, გეტყვით, რომ მისი სრული იზოლაციაც ძალიან ცუდია მისი ჯანმრთელობისთვის. ასე არ შეიძლება! რაღაც ბალანსი უნდა გავაკეთოთ.

ზოგადი მდგომარეობა არ შეცვლილა გუშინდელი მერე. რეფიდინგის პროცესი მიდის კარგად. სხვა რაღაცები კიდევ რჩება”, – განაცხადა ნიკოლოზ ყიფშიძემ.

ინფორმაციისთვის – მიხეილ სააკაშვილის ფეისბუქის ოფიციალურ გვერდზე გავრცელდა ინფორმაცია, სადაც ქვეყნის მე-3 პრეზიდენტი მოითხოვს მასთან შეუშვან პარლამენტის წევრები:

“უკვე 1 კვირაა ჩემთან არ უშვებენ ნაციონალური მოძრაობის და სხვა პარტიებიდან პარლამენტის წევრებს. ბოლო დღეებში სუსის ჩემს პალატასთან მდგომმა წარმომადგენლებმა დაიწყეს აქ მყოფი სამედიცინო პერსონალის ნამდვილი ტერორი. საგანგებოდ ჩხრეკენ მათ და მუქარანარევ გასაუბრებებს უტარებენ, რათა მე მათი მეშვეობით არ გადავცე ჩვენს საზოგადოებას გზავნილები.

თუ ხვალიდან დეპუტატების შემოსვლას არ დაუშვებენ, მე უარს ვაცხადებ მკურნალობის კურსზე და მივიღებ მხოლოდ იმ მედიკამენტებს, რომლებიც ტყვედ ჩავარდნამდე მქონდა გამოწერილი,” – აცხადებს მიხეილ სააკაშვილი.

ავტორი
ნინი ხიჯაკაძე