“იმ ადგილებში, სადაც აქციის მონაწილეები გასცდნენ მშვიდობიანი მანიფესტაციის ფარგლებს პოლიციამ მიიღო კანონით გათვალისწინებული შესაბამისი ზომები” – ვაჟა სირაძე

შინაგან საქმეთა სამინისტროს საპატრულო პოლიციის დეპარტამენტის უფროსმა ვაჟა სირაძემ ჟურნალისტებთან კომენტარი გააკეთა და განმარტა აქციაზე კონკრეტულ პირთა დაკავების მიზეზი:

,,იმ ადგილებში, სადაც აქციის მონაწილეები გასცდნენ მშვიდობიანი მანიფესტაციის ფარგლებს და იქ, სადაც მოახდინეს სახელმწიფო დაწესებულებების შესასვლელების ბლოკირება, პოლიციამ მიიღო კანონით გათვალისწინებული შესაბამისი ზომები.

როგორც მოგეხსენებათ, შეკრებისა და მანიფესტაციის შესახებ საქართველოს კანონით აკრძალულია სახელმწიფო დაწესებულების შესასვლელების ბლოკირება. შესაბამისად, ჩვენ მოვუწოდებთ აქციის მონაწილეებს, რომ ეს არის კანონის დარღვევა და თქვენი თანდასწრებით არა ერთხელ, ამ შემთხვევაში საუბარი მაქვს სახელმწიფო უსაფრთხოების შენობასთან არსებულ სიტუაციაზე – მოვუწოდეთ გადასულიყვნენ და არ გაეგრძელებინათ კანონის დარღვევა.

ამ ეტაპისთვის, ამ დროისთვის დაკავებულია 46 პირი ადმინისტრაციულად, პოლიციის კანონიერი მოთხოვნის დაუმორჩილებლობისათვის, პოლიციისადმი შეურაცხყოფის მიყენებისთვის, წვრილმანი ხულიგნობისთვის, ასევე გზის მეორე მხარეს აგრძელებდნენ დაუმორჩილებლობას და პოლიციას აყენებდნენ შეურაცხყოფას“, – განაცხადა ვაჟა სირაძემ.

ავტორი
ნინი ხიჯაკაძე