ტელეკომპანია “მთავარი არხის” გენერალური დირექტორი, ნიკა გვარამია “ლეიბორისტული პარტიის” თავმჯდომარის, შალვა ნათელაშვილის მიერ სოციალურ ქსელში, მის მიმართ, გამოთქმულ მწვავე შეფასებებს ანალოგიური სიმწვავით პასუხობს:
“ეს არის ჩემი ბოლო კომუნიკაცია ბატონ შალვა ნათელაშვილთან, კომენტარი მის სამარცხვინო სტატუსზე.
პასუხსაც არ გაგცემთ, ბატონო შალვა. უკვე ღირსების საკითხია, თქვენთან დამშვიდობება. და ბავშვიყლაპია მე კი არ ვარ, თქვენ ხართ – 25 წელი რომ “სამ ტანცუიუ სამ პაიუს” აკეთებთ პარტიისგან, რომელიც ჯერ კიდევ 20 წლის წინ რეიტინგების ლიდერი იყო და დღეს, თქვენი ეგოცენტრიზმის გამო, ერთი მისხალით არ გაზრდილა. პირიქით, დიდი ტემპით და შეუქცევადად დეგრადირებს. სრულიად ცხადია, რომ სანამ არსებობთ მაგ პარტიაში, ბავშვიყლაპიაც, დიდებყლაპიაც თქვენ ხართ და პოლიტიკაში უკვე ქარიყლაპიად იქეცით ერთი და იგივე ტექსტების გამეორებით უკანასკნელი 20 წლის განმავლობაში და წარმატებას მხოლოდ სრულიად არასერიოზული აღქმის პერსონად საკუთარი თავის გამოძერწვაში მიაღწიეთ (არადა შეუძლებელია თქვენი ნიჭიერების არაღიარება). მაგრამ, ეს თქვენი არჩევანია.
ჩემთვის გულდასაწყვეტი არჩევანი.
დღეს ედისონის კვლევები ქვეყნდება “ფორმულაზე”. დაველოდები შედეგებს. და თუ ეს შედეგები ჩვენსას დაემთხვევა, ან ბოდიშს მოხდას აირჩევთ, ან პოლიტიკური სახადი გახდებით.
სხვაფრივ მშვიდობით მეყოლეთ. ნუ შეგეშინდებათ, თქვენს თხოვნა-მუდარა-შემოთავაზებებზე არსად, არავისთან, არასდროს არ ვისაუბრებ.
ps მეტი კომენტარი ჩემგან ბატონ ნათელაშვილზე აღარ იქნება. არ ვაპირებ, უღირსობას უღირსობით ვუპასუხო.
ბოლოს კი შეგახსენებთ, რომ ქვემოთ მოყვანილ ვიდეოში მოლაპარაკე კაცი, ნათელაშვილის მოყვანილია პოლიტიკაში და საკრებულოს თავმჯდომარედ დასმული მოქალაქეთა კავშირთან ერთად,” – წერს ფეისბუქის პირად გვერდზე ნიკა გვარამია.
