ქვეყანაში არსებულ ეპიდემიოლოგიურ მდგომარეობას და მუნიციპალური ტრანსპორტის ფუნქციონირებაზე დაწესებული შეზღუდვის გაუქმებას ეხმიანება „დაავადებათა კონტროლისა და საზოგადოებრივი ჯანმრთელობის ეროვნული ცენტრის“ ხელმძღვანელი ამირან გამყრელიძე და მოსახლეობას, ისევ და ისევ, დაწესებული რეგულკაციების დაცვისკენ მოუწოდებს:
“გრძელდება სტაბილიზაციისკენ სვლა ანუ უმჯობესდება ეპიდსიტუაცია. ყველა მაჩვენებელი – ახალი შემთხვევების რაოდენობა მცირდება, რეპროდუქციის ინდექსი 0.7-ზეა ჩამოსული, დადებითობის დღევანდელი 5-6 პროცენტს შორისაა, ბოლო 7 და 14 დღის მაჩვენებელი უკვე მყარადაა 8%-ის ქვემოთ, ხოლო ბოლო 1 თვის განმავლობაში 10%-ს ჩამოსცდა. ყველაზე მძიმე ინდიკატორი – სიკვდილიანობა, მართალია ჯერ ბევრია, 48 ფაქტი მაღალია, მაგრამ აღარაა ის 60-70-80, რაც იყო. ანუ ყველა მაჩვენებელი მიდის დამშვიდებისკენ და ჩვენზე ბევრია დამოკიდებული, თუ როგორ შევინარჩუნებთ ამ სტაბილურ სვლას გაუმჯობესებისკენ.
უნდა დავიცვათ ის რეკომენდაციები, რაც არის და უნდა გავამკაცროთ. მცირედით, 4%-ით, მაგრამ მაინც აიწია პირბადის გამოყენების მაჩვენებელმა – 47%-მდე, თუმცა 50%-ია თამასა და თანდათანობით უნდა ავიდეთ 80-90%-ზე, ხოლო 95%-ზე უფრო უკეთ იქნება ეპიდსიტუაციის გაუარესების შეკავების ტენდენციები.
ბევრია დამოკიდებული იმაზე, თუ როგორ დავიცავთ წესებს ავტობუსში, მეტროში.
მინდა მოვუწოდო პოლიციას, შრომის ინსპექციას, ყველა მუნიციპალიტეტს აქვს თავისი საზედამხედველო ორგანოები, რომ განსაკუთრებული სიმკაცრით იყოს კონტროლი აღსრულებაზე პირბადის ტარებასთან დაკავშირებით. პირბადის ტარების მაჩვენებლით, ჩვენ თუ 90-95%-ზე ავალთ პირბადის ტარების მაჩვენებლით – დეკემბრამდე მოხერხდება 200-250 ადამიანის სიცოცხლის შენარჩუნება. ისევე როგორც, თუ 1000 ადამიანი ორჯერადად აიცრება – ეს არის 1 ადამიანის სიცოცხლის გადარჩენა. მაგრამ მარტო ზედამხედველობა, მარტო დაშინება, მარტო ჯარიმა, მარტო შოლტი და მათრახი არა… უკვე 2 წელი გადის, რაც ეს კოვიდი არსებობს, ამიტომ ჩვენ უნდა შევიგნოთ, რომ საკმაოდ ვერაგი ვირუსია და დავრწმუნდით ამაში, ისევე როგორც დავრწმუნდით და უნდა გავითავისოთ ყველამ ეს ყველაზე მარტივი აღსასრულებელი საკითხი, რასაც პირბადის ტარება ჰქვია. ამდენს რომ ვამბობთ, იცავს ბატონო, იცავს და ამიტომ ვატაროთ ყველამ პირბადე“, – განაცხადა ამირან გამყრელიძემ.
