პოლიტიკური მოძრაობა ,,დროა’’-ს ლიდერმა ელენე ხოშტარიამ დღეს გამართულ საგანგებო ბრიფინგზე ხელისუფლება პოლიტიკური ოპონენტების წინააღმდეგ რეპრესიებში დაადანაშაულა და ასევე კომენტარი გააკეთა ქვეყანაში არსებულ შერჩევით სამართალთან დაკავშირებით. ოპოზიციონერი ლიდერის განცხადების მიზეზი გახდა ,,ტვ პირველის“ ჟურნალისტის ლექსო ლაშქარავას გარდაცვალების შემდეგ გამართულ საპროტესტო აქციებზე გამოხატული პროტესტის კონკრეტული ფორმის გამო პარტიის აქტივისტებსისთვის დღეს 5000-5000 ლარიანი ჯარიმების გამოწერა:
,,ხელისუფლება აგრძელებს რეპრესიებს პოლიტიკური ოპონენტების, აქტივისტების და ამ შემთხვევაში ,,დროას“ წევრების წინააღმდეგ. ხაზი მინდა გავუსვა, მათ შორის, წინა საარჩევნო პერიოდში და მერიის ხელით – შუშანა მაცაბერიძე, რომლის წინააღმდეგაც მიმდინარეობს 4 უსამართლო სასამართლო პროცესი ლეგიტიმური, სამართლიანი, ღირსეული პროტესტის გამო და ნათია ლეთოდიანის წინააღმდეგ ლექსო ლაშქარავას მოკვლის გაპროტესტების გამო, როდესაც მათ შადრევანში ჩაასხეს აკვარელი. დღეს მერიამ მათ გამოუწერა 5 000-5 000 ლარიანი ჯარიმა.
მინდა საზოგადოებას შევახსენო, რომ უცნობის აქციის დროს, როდესაც მართლაც შეიძლება იფიქრო რაღაცა ზიანდება ქალაქში – ბერლინის კედლის მონუმენტი როდესაც დააზიანეს, საზოგადოების აღშფოთების შემდეგ 1 000 ლარიანი ჯარიმა გამოუწერეს უცნობს.
ეს არის სწორედ ის შერჩევითი სამართლის მაგალითი, როდესაც ამ ლეგიტიმური პროტესტის ფონზე 5 000 ლარიან ჯარიმას უწერენ, ხოლო საკუთარი სასურველი ადამიანების მიმართ, ეს არის მხოლოდ მინიმალური სასჯელი. ეს არ არის ყველაზე მნიშვნელოვანი.
პროტესტი, რომლის გამოც დღეს ისჯებიან შუშანა მაცაბერიძე და ნათია ლეთოდიანი, რომლის ოჯახის წევრი 20 ივნისის მსხვერპლია ასევე, ამ პროტესტის საგანი იყო მოძალადე ხელისუფლების მიერ შექმნილი მოძალადეების მხრიდან ადამიანის მკველელობა. არც ერთი ეს მოძალადე დღეს დასჯილი არ არის. ეს მოძალადეები დღეს აგრძელებენ კანონის დარღვევას და ხელისუფლება მათ აფარებს ხელს. ისინი წარმოადგენენ საფრთხეს აბსოლუტურად ყველასთვის“, – განაცხადა ელენე ხოშტარიამ.
ავტორი
ნინი ხიჯაკაძე
