,,მთავარი“ არხის გენერალური დირექტორის ნიკა გვარამიას შესაძლო ლიკვიდაციის საქმეზე სუს-მა გამოძება დაიწყო. აღნიშნულთან დაკავშირებით კომენტარს აკეთებს გვარამია და აცხადებს, რომ ეს მისი დაშინების მცდელობაა ან პროვოკაცია:
,,10 დღეზე მეტია უბრალოდ ეს ინფორმაცია არსებობს. მივაწოდე ჩვენს უცხოელ პარტნიორებს, სახალხო დამცველსაც და მათი რჩევითაც და ჩემი გადაწყვეტილებითაც მოვედი კონტრტერორისტულ დეპარტამენტში.
ინფორმაცია ეხება ჩემი ფიზიკური ლიკვიდაციის დაგეგმვას. ეს ბევრჯერ უთქვამთ, მაგრამ ზედმეტად დეტალური იყო იმისთვის, რომ ყურადღება არ მიმექცია. სახელები, გვარები, შემოსვლები, ვინ შემოვიდა, კიდევ ვინ შემოვიდა, როდის და ა.შ.
გულწრფელად გითხრათ, ახლაც დარწმუნებული ვარ, უფრო დაშინების მცდელობაა, რაც ფუჭია ან რაღაც პროვოკაცია. თუმცა, იმდენად დეტალურია ეს ინფორმაცია, რომ დაშვება შესაძლებელია, რომ ეს სიმართლე იყოს.
ორი რამის გამო მოვედი აქ: სული ტკბილია და ბოდიში, მაგრამ მნიშვნელოვანი არის ჩემთვის ცოცხალი ვიქნები თუ არა, მაგრამ ასევე ძალიან დიდი მნიშვნელობის საკითხია ის, რომ თუ ჩემს წინაააღმდეგ რამე მოხდა, ეს მნიშვნელოვან პრობლემებს გამოიწვევს ამ ქვეყანაში. ამაში სრულიად დარწმუნებული ვარ. ეს პრობლემები ხელსაყრელი იქნება მხოლოდ და მხოლოდ ერთი სახელმწიფოსთვის. ამ სახელმწიფოს ჰქვია რუსეთი და იმ ადამიანებისთვის, ვინც აქ რუსულ პოლიტიკას ატარებს.
მინდა, მივმართო ინფორმატორს, რომელიც მე არ დავასახელე იმიტომ, რომ ჟურნალისტური პრივილეგია მაქვს, მაგრამ მინდა მივმართო მას, რომ გააკეთოს ოფიციალური განაცხადი, ამ შენობაში მოვიდეს, ან სხვაგან, როგორი ფორმითაც თვითონ ჩათვლის და მიაწოდოს ინფორმაცია ოფიციალურად“, – განაცხადა ნიკა გვარამიამ.
ავტორი
ნინი ხიჯაკაძე
