საქართველოს მე-3 პრეზიდენტი, მიხეილ სააკაშვილი ვიდეომიმართვით ეხმიანება “ქართული ოცნების” მიერ მიღებულ გადაწყვეტილებას, შარლ მიშელით შეთანხმებიდან გასვლასთან დაკავშირებით, საქართველოს მოსახლეობას ადგილობრივი თვითმმართველობის არჩევნებში აქტიურობისკენ მოუწოდებს და კიდევ ერთხელ იძლევა დაპირებას, რომ ოქტომბრის რეფერენდუმის წინ აუცილებლად ჩამოვა საქართველოში:
“გუშინ ივანიშვილმა მთელი მსოფლიოს გასაგონად წინასწარვე აღიარა მარცხი ოქტომბრის რეფერენდუმზე. ის რაც მან გუშინ გააკეთა არის უპრეცენდენტო საქართველოს უახლეს ისტორიაში და ერთადერთი პარალელი არის ის, რაც გააკეთა იანუკოვიჩმა, როდესაც გამოვიდა ევროკავშირთან შეთანხმებიდან 2013 წელს და რა მოჰყვა ამას უკრაინაში – იანუკოვიჩისა და მისი ბანდისთვის, ყველას კარგად უნდა ახსოვდეს.
რა თქმა უნდა, ივანიშვილის გეგმები არის გასაგები – აგვისტოს ბოლოს აპირებს დახუროს ოპოზიციური მედია, სანამ მთელი მსოფლიო და ქართველების ნაწილი წასულია შვებულებებში, შემდეგ აპირებს, რომ კოვიდის საფარქვეშ შემოიღოს შეზღუდვები, დააშინოს ხალხი. რამდენჯერ უნდა ჩაგვიტაროს ერთი და იგივე ხრიკი?!
იმ პირობებში, როდესაც ივანიშვილმა გააუქმა ევროკავშირის მიერ შეთანხმებით შემოთავაზებული რეფერენდუმი რიგგარეშე საპარლამენტო არჩევნებზე, ჩვენ მაინც უნდა ჩავატაროთ სახალხო რეფერენდუმი ივანიშვილის ხელისუფლებიდან წასვლაზე. ეს მოხდება მომავალ ადგილობრივი თვითმმართველობის არჩევნებზე.
ქართველ ხალხს უნდა ღირსეული ცხოვრება და ამ გაჭირვების გადალახვა, მას მობეზრდა ჭაობში, სიღატაკეში, უპერსპექტივობაში ცხოვრება. ამიტომ ეს არჩევნები მაინც ჩატარდება და მეც ჩემ ვალდებულებას, რომელიც ავიღე ჩემი ერისა და ისტორიის წინაშე, რომ ჩამოვიდე საქართველოში, უკვე ამ სახალხო რეფერენდუმის წინ, ზედმიწევნით შევასრულებ.
ივანიშვილი ვერ ეღირსება ამჯერად ქართველი ხალხის ფეხქვეშ გათელვას, მისი ხელისუფლება დამთავრებულია! ახლა უკვე საკითხი დგას ამ ყველაფრის სწორად გაფორმების. მენდეთ, ბოლომდე ვიბრძოლებ, არასდროს არ გირალატებთ მე და ჩემი თანამებრძოლები. ჩვენ ყველაფერი გამოგვივა, აუცილებლად გავიმარჯვებთ. ეს წელი არის გამარჯვების წელიწადი,” – აცხადებს მიხეილ სააკაშვილი.