საქართველოს პროკურატურასთამ, 5-6 ივლისის მოვლენებთან დაკავშირებით, მედიის წარმომადგენლების მიერ გამართულ საპროტესტო აქციაზე „მთავარი არხის“ ჟურნალისტმა პაატა იაკობაშვილმა შეფასებები გააკეთა ქვეყანაში მიმდინარე პროცესთან დაკავშირებით, ასევე, მედიასთან მიმართებაში ხელისუფლების დამოკიდებულებაზე და განაცხადა, რომ ხელისუფლება ცდილობს ყველა შესაძლო გზებით შეზღუდოს ქვეყანაში სიტყვის თავისუფლება, შეზღუდოს დამოუკიდებელი მედია:
„პირველ რიგში, თეა წულუკიანის ქმედება, მიკროფონის წართმევას ვგულისხმობ, რა თქმა უნდა, არის პირდაპირი სიმბოლო სიტყვის თავისუფლებაზე შეტევის და პირდაპირი მცდელობა ზიანი მიაყენოს დამოუკიდებელ მედიას. ეს სხვანაირად არანაირად არ განიმარტება. ეს არ არის იუმორი და თუ არის ძალიან მდაბიო ხარისხის იუმორია და არ არის სხვა არაფერი, არც თავის დაცვა, არც კითხვებისგან თავის არიდება. ეს არის თავისუფალ მედიაზე პირდაპირი თავდასხმა.
მეორე, რაც მინდა კიდევ ერთხელ ვთქვა და პირველ რიგში ვუთხრა მაყურებელს. ბიძინა ივანიშვილის საყვარელი ბიჭი, რომელიც დღეს პრემიერ მინისტრია ყოველდღიურად ცდილობს დაგვადანაშაულოს ჟურნალისტები და გვეძახის პარტიულ აქტივს. მაგრამ იცოდეთ, ირაკლი ღარიბაშვილმა ეს ძალიან კარგად იცის და თქვენც უნდა იცოდეთ, ჩვენ ვიბრძვით იმისთვის, რომ ქუჩებში არ გვცემდნენ და არც გვკლავდნენ, არც ჟურნალისტებს, არც ნებისმიერ სხვა პროფესიის ადამიანებს და საერთოდ არავის ამ ქვეყანაში.
და რადგან ჩვენ გვცემენ, გვკლავენ და ეს ხდება არაერთხელ, უკვე წლების განმავლობაში, სწორედ ამიტომ მოვითხოვთ ხელისუფლების შეცვლას. იმ ხელისუფლების შეცვლას, რომელმაც ვერ უზრუნველყო წესრიგი ამ ქვეყანაში. ეს არის პოლიტიკური მოთხოვნა, მაგრამ ეს არ არის პოლიტიკური პარტიების დაკვეთის შესრულება. ჩვენ, ამ ქვეყნის მოქალაქეები მოვითხოვთ მთავრობის ცვლილებას იმისთვის, რომ ამ ქყევნაში იყოს წესრიგი. ამის უფლება გვაქვს ჟურნალისტებსაც და ყველას. ასე რომ, არ მოუსმინოთ ბიძინა ივანიშვილის საყვარელ ბიჭს“, – განაცხადა პაატა იაკობაშვილმა.
