ნინოწმინდის ბავშვთა პანსიონის ხელმძღვანელ მეუფე იაკობთან მიღწეული შეთანხმების შესაბამისად სახალხო დამცველი დღეს ნინოწმინდაში ჩავიდა ბავშვთა პანსიონის მოსანახულებლად და იქ არსებული მდგომარეობის შესაფასებლად. აღნიშნულთან დაკავშირებით ომბუდსმენმა კომენტარი გააკეთა ჟურნალისტებთან:
„მაქვს მოლოდინი, რომ მოგვეცემა შესაძლებლობა სრულყოფილად გავეცნოთ მიმდინარე პროცესებს და ინფრასტრუქტურულ მდგომარეობას. ჩამოვედი აპარატის რამდენიმე თანამშრომელთან ერთად, რომლებიც ბავშვთა უფლებების მიმართულებით მუშაობენ, ასევე გვახლავს ბავშვთა ფსიქოლოგი და თუ ბავშვებს ჩვენთან საუბრის სურვილი ექნებათ, გავესაუბრებით.
პირველ რიგში შეხვედრა გვექნება პანსიონის ხელმძღვანელობასთან, მეუფე იაკობთან და შემდეგ ასევე ვაპირებთ, რომ ვნახოთ, რა პროცესები მიმდინარეობს ბავშვების საჭიროებების შეფასებებთან დაკავშირებით და რას აკეთებენ სოციალური მუშაკები.
რამდენიმე აღსაზრდელის გადაყვანა კიდევ იგეგმება ალტერნატიულ ზრუნვაში და მნიშვნელოვანია, რომ პანსიონში დარჩენილ ბავშვებთან დაკავშირებითაც ძალიან მალე იქნას გადაწყვეტილებები მიღებული“, – განაცხადა ნინო ლომჯარიამ.
