საქართველოს პარლამენტი, ფრაქცია “შარლ მიშელის რეფორმების ჯგუფის” საკანონმდებლო ინიციატივას განიხილავს, რომლის მიხედვით, პენსიონერს უფლება ექნება პენსიის გამცემი საბანკო დაწესებულება თავად აირჩიოს და სურვილის შემთხვევაში, ნებისმიერ დროს შეცვალოს ის. კანონში ცვლილებების პროექტს საფინანსო-საბიუჯეტო კომიტეტი დღევანდელ სხდომაზე განიხილავს.
პროექტი პარლამენტის წევრების: გიორგი ვაშაძის, პაატა მანჯგალაძის, თეონა აქუბარდიას, ხათუნა სამნიძის და ტარიელ ნაკაიძის საკანონმდებლო ინიციატივაა.
ვაშაძის თქმით, საქართველოში ყველაზე ძვირ სესხს ერთ-ერთი ყველაზე მოწყვლადი ჯგუფი – პენსიონერები იღებენ. როგორც ინიციატორები განმარტავენ, საქართველოში პენსიის გაცემის ექსკლუზიურ უფლებას “ლიბერთი ბანკი” ფლობს, მას არ ჰყავს კონკურენტი და შესაბამისად, ბაზარზე პირობებს სწორედ “ლიბერთი ბანკი” ადგენს.
“ქვეყანაში დაახლოებით 800 000 პენსიონერია, რომელთა თითქმის ნახევარი საპენსიო სესხით სარგებლობს. “ლიბერთი ბანკში“ საპენსიო სესხის საპროცენტო განაკვეთი იმაზე გაცილებით მეტია, ვიდრე მაგალითად, სხვა მოქალაქეებისათვის გაცემული სესხის წლიური საპროცენტო განაკვეთი, რომელიც სხვადასხვა ბანკში 15%-დან იწყება. რომ არა “ლიბერთი ბანკის“ ექსკლუზიური უფლება საპენსიო მომსახურებაზე, თავისუფალი კონკურენციის პირობებში, საქართველოში საპენსიო სესხის საპროცენტო განაკვეთი არსებულზე გაცილებით ნაკლები იქნებოდა“, – აცხადებენ ფრაქციაში.
ინფორმაციას ფრაქცია “შარლ მიშელის რეფორმების ჯგუფი” ავრცელებს
