პარლამენტის პლენარულ სხდომაზე სიტყვით გამოსვლისას, “სტრატეგია აღმაშენებლის” თავმჯდომარე, გიორგი ვაშაძე შარლ მიშელის დოკუმენტის მნიშვნელობაზე ამახვილებს ყურადღებას და ასევე საუბრობს ქვეყანაში არსებული მძიმე სოციალურ-ეკონომიკური პრობლემების შესახებ:
„დღეს უამრავ მშიერ ადამიანს საქართველოში აინტერესებს როდის დაპურდება და როდის იქნება ის საკანონმდებლო აქტები, რომლებიც ეკონომიკას განავითარებს. უამრავ უმუშევარ ადამიანს აინტერესებს როდის ექნება სამუშაო ადგილი, საქართველოდან გაქცეულ ემიგრანტებს აინტერესებთ როდის დაბრუნდებიან საკუთარ სამშობლოში. საქართველოს მოსახლეობას აინტერესებს როდის ვიქნებით ევროკავშირის სრულუფლებიანი წევრი.
მოსახლეობის უმრავლესობას უმრავლესობისგანაც და ოპოზიციისგანაც აინტერესებს როდის დადგება დრო, რომ ქართული პოლიტიკის ამოსავალი წერტილი იქნება საქართველოს მოქალაქე, ადამიანი, რომელიც არის უმძიმეს ვითარებაში და არა პოლიტიკური კინკლაობა, პოლიტიკური ანგარიშსწორება და დაპირისპირება“, – აცხადებს გიორგი ვაშაძე.
გიორგი ვაშაძე მიიჩნევს, რომ შარლ მიშელის დოკუმენტის „დახურდავება“ პარლამენტში შესვლა-არშესვლაში არის იაფფასიანი მცდელობა საქართველოს სტრატეგიული განვითარების გზის დაბრუნება ისევ პოლიტიკურ კინკლაობაში.
„დელეგაცია დელეგაციაზე ჩამოდის ამერიკის შეერთებული შტატებიდან, ევროკავშირიდან, იმიტომ, რომ ისინი ხედავენ, რომ შარლ მიშელის დოკუმენტის ხელმოწერის შემდეგ საქართველოს გაუჩნდა ევროატლანტიკური ინტეგრაციის კიდევ უფრო მეტი პერსპექტივა“, – განაცხადა მან.
მან თავის გამოსვლაში მადლობა გადაუხადა ოპოზიციის ლიდერებს, – „ვინც ყინულმჭრელის ფუნქცია შეასრულა ამ მძიმე ორპარტიულ დაპირისპირებაში, ვინც ხელი მოაწერა ამით აიძულა „ქართული ოცნება“ და სხვა პოლიტიკური პარტიები რომ შეერთებოდნენ ამას და ხელი მოეწერათ შარლ მიშელის დოკუმენტისთვის“ – აღნიშნა გიორგი ვაშაძემ.
ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს
