ნამახვანჰესის წინააღმდეგ გამართულ საპროტესტო აქციას ეხმიანება “ქართული ოცნების” გენერალური მდივანი, თბილისის მერი. კახა კალაძე ჟურნალისტებთან კონკრეტულ შეფასებებს აკეთებს და სიამაყით აღნიშნავს მისი ენერგეტიკის მინისტრობის პერიოდში მიღწეულ წარმატებებს:
“რაც შეიძლება მეტი ჰიდროელექტროსადგური უნდა აშენდეს ქვეყანაში. მაქსიმალურად რაციონალურად უნდა იქნეს გამოყენებული ის რესურსები, რომელიც ქვეყანას გააჩნია იმისთვის, რომ მე, თქვენ, ჩვენი ქვეყნის მოქალაქეები არ ვიყოთ დამოკიდებული რუსეთიდან, აზერბაიჯანიდან, თურქეთიდან, სომხეთიდან შემოტანილ ელექტროენერგიაზე. მე, როდესაც ენერგეტიკის მინისტრი ვიყავი, რაც ნამდვილად მეამაყება. ჩემი მინისტრობის პერიოდში ყველაზე მეტი ჰიდროელექტროსადგური აშენდა, რაც ძალიან მაგარია ქვეყნისთვის“, – განაცხადა კახა კალაძემ.
ინფორმაციისთვის: 23 მაისს, თბილისში “რიონის მცველების” ორგანიზებით გაიმართა აქცია “არა ნამახვანჰესს”.
ავტორი
თეკლა თოდუა
