რესპუბლიკის მოედანზე გაიმართა მორიგი “რიონის მცველების” საპროტესტო აქცია ნამახვანჰესის მშენებლობის შეჩერებასტან დაკავშირებით. საპროტესტო აქციის ერთ-ერთი ორგანიზატორი, ვარლამ გოლეთიანი მოითხოვს, რომ აღიძრას სისხლის სამართლის საქმე ყოფილ პრემიერ-მინისტრ გიორგი გახარიასა და ეკონომიკის მინისტრ ნათია თურნავაზე, რადგანაც მიაჩნია, რომ ისინი იყვნენ უშუალოდ ჩართულები ნამახვანჰესთან დაკავშირებული დოკუმენტაციის მომზადების პროცესში:
,,აღიძრას საქმე ყველა იმ პირზე, რომლებიც ჩართულნი იყვნენ აი ამ დოკუმენტაციის მომზადების პროცესში.
თქვენ იცით, რომ ჩვენ ვითხოვდით და ვითხოვთ, ეკონომიკის მინისტრის გადადგომას იმ ქმედების გამო, რაც მან გააკეთა მუნიციპალიტეტის შენობაში, ქუთაისში. როცა გვაბრალებენ, ჩვენ თითქოს დიალოგზე არ მივდივართ, ვიყავით მისული 8 ადამიანის შემადგენლობით. თვითონ გაიპარა ამ შეხვედრიდან.
ამიტომ, აი ამ შეურაცხმყოფელი ჟესტის გამო შემდგომ აქციაზე მოვითხოვეთ მისი გადადგომა. თუმცა, დღეს ემატება მისი პასუხისმგებლობის საკითხი ამ ნაწილში.
აუცილებლად უნდა აღიძრას სისხლის სამართლის საქმე არა მარტო ნათია თურნავასთან დაკავშირებით, არამედ ყველა იმ პირთან დაკავშირებით რომელიც ხელს აწერს კონკრეტულ დოკუმენტაციებს ამ პროექტთან მიმართებაში.
ბატონი გახარიას ხელმოწერაც არის რიონის ხეობის გადაცემასთან დაკავშირებით. ვიცით, რომ 121 ლარად გაყიდეს მთელი ხეობა. უბრალოდ რატომ და რისთვის?! სრულიად დაუსაბუთებლად.
ამიტომ ხშირად ხდება აპელირება თითქოს იმის, რომ ჩვენ რაღაც პოლიტიკური ინტერესი გვაქვს და ამიტომ ვაყენებთ მისი პასუხისმგებლობის საკითხს.
არა, მეგობრებო, ასე არ არის. ვინც კი დამნაშავეა, სწორედ ამ ნიშნით უნდა აგოს პასუხი. ვერ შევიკავებთ თავს, თუ ვინმე დღეს რაღაც პარტიული ძალის ჩამოყალიბება უნდა ამ ქვეყანაში, ბოდიში მასთან, თუ რაღაც დანაშაული აქვს ჩადენილი არ ვთქვათ იმიტომ, რომ ხელი არ შეეშალოს მისი პარტიული მიზნების განხორციელებაში. ვერ გავიზიარებთ ამ მოსაზრებას, რომ ჩვენ ხელს ვუშლით ამ პროცესს, პირიქით ეს არის წინ გადადგმული ნაბიჯი, როცა დაეშვება პრეცენდენტი იმისა, რომ დამნაშავეები ბოლოსდაბოლოს დაისჯებიან ამ ქვეყანაში – ეს არის უმნიშვნელოვანესი”, – ვარლამ გოლეთიანი.
ავტორი
ნინი ხიჯაკაძე
