,,ქართული ოცნება“ დაჩქარებული წესით აპირებს, აირჩიოს იუსტიციის უმაღლესი საბჭოს წევრები – ამის თაობაზე საქართველოს პარლამენტში ჩატარებულ ბრიფინგზე ,,სტრატეგია აღმაშენებლის“ ლიდერმა გიორგი ვაშაძემ განაცხადა და აღნიშნა, რომ ხელისუფლების ამგვარი გადაწყვეტილება ეწინააღმდეგება შარლ მიშელის შეთანხმებას. ოპოზიციონერი ლიდერი მმართველ პარტიას მოუწოდებს, რომ შეაჩეროს პროცესი და დროულად მოეგოს გონს:
,,მომავალ კვირაში ,,ქართული ოცნება“ მზაკვრულად გეგმავს, რომ დაჩქარებული წესით აირჩიოს იუსტიციის საბჭოს წევრები, რაც კატეგორიულად მიუღებელია ჩვენთვის.
ხაზგასმით ვამბობ, რომ ეს ეწინააღმდეგება 19 აპრილის, შარლ მიშელის შეთანხმებას და რაც ყველაზე მნიშვნელოვანია, ეწინააღმდეგება იმ ფუნდამენტურ მართლმსაჯულების რეფორმას, რომელიც შეთანხმების დოკუმენტით უნდა განხორციელდეს საქართველოში.
უფრო მეტიც, მე-3 პუნქტის მე-3 ქვეპუნქტი პირდაპირ ამბობს, რომ იუსტიციის უმაღლესი საბჭოს სიღრმისეული რეფორმა უნდა განხორციელდეს სწორედ ამ დოკუმენტის შესაბამისად.
მედიატორებს პირდაპირი კომუნიკაცი ჰქონდათ ყველა ხელმომწერ მხარესთან, ,,ქართული ოცნების“ ჩათვლით. მათი პოზიცია ცნობილია: დიახაც, ისინიც მიიჩნმევენ, რომ დაუყოვნებლივ უნდა მოხდეს შეჩერება იუსტიციის უმაღლესი საბჭოს წევრების შერჩევის პროცესის და უნდა განისაზღვროს ახალი პროცედურა, რომელსაც საზოგადოების მხრიდან მეტი ნდობა ექნება.
მივმართავ საქართველოს პარლამენტის თავმჯდომარეს, ,,ქართული ოცნების“ სპიკერს ირაკლი კობახიძეს და რაც მთავარია სასამართლოში კლანს: მეგობრებო! გვესმის, რომ თქვენ შეიძლება სურვილი გაქვთ სწრაფად ჩაფარცხოთ ეს საკითხი, მაგრამ ესე არ გამოვა. ეს რეფორმად ვერ ჩაითვლება. ეს დანიშვნები იქნება არალეგიტიმური და უკანონო, შეთანხმების სულისკვეთების საწინააღმდეგო.
ამიტომ მოგიწოდებთ, შეაჩერეთ იუსტიციის უმაღლესი საბჭოს წევრების არჩევის პროცესი! ისევე, როგორც შეჩერდა უზენაესი სასამართლოს მოსამართლეების უვადოდ დანიშვნის პროცესი. წინააღმდეგ შემთხვევაში ჩვენ მოგვიწევს მივმაროთ კიდევ უფრო მკაცრ ზომებს ოპოზიციამ, რომლებმაც ხელი მოვაწერეთ ამ შეთანხმებას.
დაუყოვნებლივ უნდა შეწყდეს ეს უკანონო, არალეგიტიმური არჩევის პროცესი, რომლითაც კლანს უნდა, რომ კიდევ უფრო გაამყაროს საკუთარი ძალაუფლება სასამართლოში.
ჩვენ ამისთვის ყველაფერს გავაკეთებთ, როგორც საკანონმდებლო ინიციატივებით, ასევე, თუ მოგვიწევს, რაღა თქმა უნდა, საპროტესტო ღონისძებებითაც. იმედი მაქვს, დროულად გონს მოეგება ,,ქართული ოცნება“, – განაცხადა გიორგი ვაშაძემ.
ავტორი
ნინი ხიჯაკაძე
